Hâkipây-i Mustafâ'ya Yüz Süren Mesrûr Olur
24 Ekim 2022 tarihinde yayınlanmıştır.
NUTK-İ ŞERÎF
Hâkipây-i Mustafâ'ya yüz süren mesrûr olur
Her ne denli mücrim ise 'âkıbet mağfûr olur
Mest-i câm-ı 'aşk olup düş râh-ı 'uşşâka hemân
Bu harâbât-ı muhabbetde düşen ma'mûr olur
Şevk ile hark-ı hicâb ide 'aceb mi 'âşıkân
Sînesin çâk itse mecnûn-ı Hudâ ma'zûr olur
Kevkeb-i 'izz ü sa'âdet pertevidir 'adl ü dâd
Dâimâ sultân-ı 'âdil gâlib ü mansûr olur
'Âşıkın bağrı yanup âh-ı sehergâh itmede
Kalbe kim nâr-ı muhabbet irişe mahrûr olur
Mu'cizât-ı Hazret-i Şâh-ı rusül ider zuhûr
'Avn-i Bârî irişüp a'dâ-yı dîn makhûr olur
Hû ile vakt-i seherde seyr-i lâhût idegör
Zâkir-i Hakk'ın Zekâyî bâtını pür-nûr olur
Şeyh Zekâî Efendi
Kuddise Sırruh