Hakk Cemâlin İsteyüp Hayrân Olan Gelsün Beru

31 Ocak 2020 tarihinde yayınlanmıştır.

NUTK-İ ŞERÎF

Hakk cemâlin isteyüp hayrân olan gelsün beru

Cân u nefsin zebh edüp kurbân olan gelsün beru

'Aşk ile hem şevk ile hem derd ile zikreyleyen

'Âr u nâmûs terk edüp destân olan gelsün beru

'Aşk şerâbın sâkîden içüp safâ vü zevk eden

Düşüben bîhûş olup mestân olan gelsün beru

Rûz u şeb derd-i Ehad'den âh u feryâd eyleyen

Gözlerinden kân akup giryân olan gelsün beru

Eyyühe'l-'uşşâk zikre hâm olanlar gelmesün

Âteş-i 'aşka düşüp büryân olan gelsün beru

Fânîye meyl etmeyüp bâkîye hizmet eyleyen

Rabbine kulluk edüp sultân olan gelsün beru

Sündüs ü istebraka meyl etmeyüp Hakk dileyen

Mâsivâdan kurtulup 'uryân olan gelsün beru

Muhyî meydân içre bâşın top edüp cevlân iden

Mahv olup meydân-ı Hakk'da fânî olan gelsün beru

Bezcizâde Şeyh Mehmed Muhyiddîn

Kuddise Sırruh