Hakk'ın Ol Künh-i Zâtından Olupdur Enbiyâ Peydâ
10 Ocak 2022 tarihinde yayınlanmıştır.
NUTK-İ ŞERÎF
Hakk'ın ol künh-i zâtından olupdur enbiyâ peydâ
Nebîler nûru vârından olupdur evliyâ peydâ
Velâyet 'ilmi sırrından hitâb eyler sana cânım
Evliyâ nûr-i vârından edüpdür 'âşıkı peydâ
Hakîkat bilmeyen kimse dekâyık n'idüğün bilmez
'Âşıkın nûr-i vârından edüpdür zâhidi peydâ
Muvahhid olmayan kimse bilmez ehl-i hâl hâlin
Zâhidin nûr-i vârından edüpdür 'âbidi peydâ
Gözünden perdeyi kaldır erişesin bu menzile
'Âbidin nûr-i vârından edüpdür nâsı hep peydâ
Cemâl-i hüsn-i bâğında 'akıllar mat u ser-gerdân
Bakılmaz kamaşır gözler 'acâib mahlûkât peydâ
Dilim söyler benim sana budur ilhâm-ı rabbânî
Sizin'çün cennet-i a'lâ yaratdı eyledi peydâ
Ne hikmetdir ne 'ibretdir dilim söyler bu tevhîdi
Gadabının kemâlinden edüpdür İblîs'i peydâ
Bu menzil-i merâtibden haber yokdur sana zâhid
Bu 'aşkın tahtgâhında olupdur rûhumuz peydâ
Benim 'âşıklar içinde sözüm sebbit ü isbatdır
Bakındı 'arşın altında bu deryâ-yı muhît peydâ
Dediler nüsha-i kübrâ ne ma'nâdır haber ver sen
Ne ki var kendüden gayrı yaratdı eyledi peydâ
Nihân 'ilmi 'ayân oldu bu tevhîdin kemâlinden
Âdemden âdeme geldi olupdur cümleden peydâ
Usûlü gel haber ver sen Vehâb-ı derdmend miskîn
Ne tutulur ne görülür esen yellerinden peydâ
Abdülvehhâb Ümmî
Kuddise Sırruh