Hamd Ola Dâim İrişdim Dostumun Dîdârına
9 Nisan 2024 tarihinde yayınlanmıştır.
NUTK-İ ŞERÎF
Hamd ola dâim irişdim dostumun dîdârına
Cân u dil gülü boyandı hüsnünün envârına
Ol muhabbet nârı yakdı cümle vârım kıldı kül
Ol külü esdi savurdu lutfunun rüzgârına
'Aşk zuhûr itdikde ol dost saçlarıŋ hep dağıtup
Ol mübârek zülfünü dökmüş güzel ruhsârına
Tâ ezelden iki yolmuş halk olan ervâhı hep
Bir gürûhu lutfa mazhar bir gürûh kahhârına
Çün celâl ile cemâli âşikârdır cümlede
Her sıfâtı hakdır anla düşme gel inkârına
Yetmeyince lutf u cevr Hakk’dan sana bir zerrece
Bir umûruŋ fi'le gelmez iş kalır hep yârına
Ḫayr u şerri Hakk'dan gayrı yokdur hiç işleyen
Böyle bilsen kişi kalmaz diyecek ağyârına
Er isen kurtar çeperden mezhebin tîz göreyim
Var mıdır kuvvet ki sende kudretin izhârına
Bu sebebdendir ki hayr irâdetin selb itmemek
Sa'y ile irer kişi her menzil-i mikdârına
Kabza-i hikmetde çün takdîr ile tedbîr anın
Tevfîk olur da idersin hayrı sen nâ-çârına
Böyle erkân eylemiş şâh-ı cihân-ı lem-yezel
Kudretin kul döndüremez bir dahi tekrârına
Ṭut Resûl'ün emrini Ḥakk'ın rızâsın dâimâ
Fırka-i nâcî dilersen teslîm ol settârına
Bedriyâ vir küllîye cüz'î irâdet iste sen
Gel karış bu günkü günde zümre-i hâsslarına
Mahmûd Bedreddin Efendi
Kuddise Sırruh