Hamdülillâh Dîn ü Îmândır Şerâb-ı Eynemâ

26 Aralık 2019 tarihinde yayınlanmıştır.

NUTK-İ ŞERÎF

Hamdülillâh dîn ü îmândır şerâb-ı eynemâ

Bârekâllah nûr-i Kur`ân'dır şerâb-ı eynemâ

Te'âlâllah zübdesidir 'ayn-ı hamr-i vahdetin

Mâşâallah sırr-ı Yezdân'dır şerâb-ı eynemâ

Nûr-i îmân nûr-i İslâm nûr-i ihsân nûr-i dîn

Nûr-i millet feyz-i Rahmân'dır şerâb-ı eynemâ

"Küntü kenz"in sırrını fâş eyleyen 'âlemlere

Nûr-i Hakk envâr-ı 'irfândır şerâb-ı eynemâ

"Rahmeten-lil-'âlemîn" iken Muhammed Mustafâ

Enbiyâya özge ihsândır şerâb-ı eynemâ

Bu şerâb cümleden efdal Habîb-i Kibriyâ

İçdiği içün 'âlî-şândır şerâb-ı eynemâ

Bu şerâbın zevkini sor enbiyâlar şâhına

Sırr-ı Mi'râc lutf-i Sübhân'dır şerâb-ı eynemâ

Bu şerâbın neş'esiyle 'arş u ferş levh u kalem

Devrederler 'âlî sultândır şerâb-ı eynemâ

Lutfiyâ bir lutf-i Hakk'dır bu şerâbın katresi

Tende cândır cânda cânândır şerâb-ı eynemâ

Alvarlı Efe Hâce Muhammed Lutfî

Kaddesallahu Sırrahu'l-Âlî