Hazret-i Hakk'dan Hidâyetdir Bu Rûh
9 Temmuz 2024 tarihinde yayınlanmıştır.
.jpg)
NUTK-İ ŞERÎF
Hazret-i Hakk'dan hidâyetdir bu rûh
Mahz-ı lutf ile 'inâyetdir bu rûh
Cümleden evvel yaratdı Zü'l-Celâl
Kâşif-i kenz-i bidâyetdir bu rûh
Tâc-ı "kerremnâ" ile mükerrem olan
Sâhib-i cümle kerâmetdir bu rûh
Yer ü gök çekmez tahammülün anın
Hâsılı sırr-ı emânetdir bu rûh
Çâr 'anâsırdır libâsı zâhiren
Rûy-i ma'nâda tahâretdir bu rûh
Cehl-i zulmetden müberrâdır özü
Âlim-i 'ilm-i diyânetdir bu rûh
Nûr-ı îmânı hayâyı cem' ider
Böyle bir sâhib-firâsetdir bu rûh
Hükm ider dâim vücûd iklîmine
Pâdişeh-i pür-'adâletdir bu rûh
Menzili firdevs-i a'lâdır anın
Kimse bilmez ne 'ibâretdir bu rûh
Ten harâb olsa da ol olmaz harâb
Mazhar-ı sırr-ı sa'âdetdir bu rûh
Vasfını bilmek muhâl-ender-muhâl
Sırr-ı Hakk disen isâbetdir bu rûh
Bedriyâ rûhdan haber virdi Resûl
Emr-i Bârî'den işâretdir bu rûh
Mahmud Bedreddin Efendi
Kaddesallahu Sırrahu'l-Âlî