Her Hâl-i Zâre Şevk İle Bula Rızâ-yı Dil
6 Nisan 2024 tarihinde yayınlanmıştır.
NUTK-İ ŞERÎF
Her hâl-i zâre şevk ile bula rızâ-yı dil
Hubb-ı sivâyı terk ile ola edâ-yı dil
Her dûne meyl olmadı zîra revâ-yı dil
Fakr ile şöyle buldu cihânda gınâ-yı dil
Mess-i vücûdun altun ider kimiyâ-yı dil
Def' eyle dilde kalmaya bir zerrece gubâr
Ağyârı yâr eyle olup merd-i nâm-dâr
Kılmaz o kimse saltanat-ı dehre i'tibâr
Ol kim hulûs-ı kalbi ola anın âsikâr
Zıll-i efken olsa başına per-i hümâ-yı dil
Hubb-ı sivâyı terk ide ol kim birer birer
Mürşid eliyle hırka-i semîneyi giyer
'Umman-ı 'aşka şevk ile ol demde meyl ider
Gavvâs-ı bahr-i vahdet olup ka'rına irer
Dürr-i murâda vâsıl olur âsinâ-yı dil
Dergâh-ı yârde dile olup himmetim benim
Bildim tezellül ile imis 'izzetim benim
Derd-i derûna çâreye yok minnetim benim
Min ba'd kalmadı dermâna rağbetim benim
Bildim ki derd-i mihnet imiş çün devâ-yı dil
Kahr it hevâ-yı nefsini pâyende olmasın
Hubb-ı sivâya meylini hâhende olmasın
A'dâ Nazîr'i rü'yet ile hânde olmasın
Rahm eyle koyma hecr ile nâlende olmasın
Olsun visâl-i yâre Sezâyî sezâ-yı dil
Hasan Sezâyî Hazretlerinin nutk-ı şerîfi üzerine Nazîr İbrâhîm Efendi'nin tahmîsidir. Kaddesallahu esrârahumâ.