Her İşde Zikrederdi Nâm-ı Rahmân Ol Kerem Kânı
28 Kasım 2022 tarihinde yayınlanmıştır.
NA'T-I ŞERÎF
Her işde zikr ederdi nâm-ı Rahmân ol kerem kânı
Senâ vü hamde Peygamber idi kân ol kerem kânı
Ol idi mazhar-ı eltâf u ilm ü hilme hem menba'
Ki hüsn-i hulk ile dolmuşdu ol cân ol kerem kânı
Hakk'ın mahlûkuna rıfk u tevâzu' eyleyüp lillah
Ederdi cümle halka lutf u ihsân ol kerem kânı
Hemân Allah için halkı severdi buğz ederdi hem
Ne dost olmuşdu nefsiyçün ne düşman ol kerem kânı
Ne güldü kahkahayla ol ne söğdü nesneye hergiz
Güzel sözlü güleç yüzlüydü her ân ol kerem kânı
Hayâ vü hilm ile mevsûf idi hem lutf u himmetle
Gelüp yalvaranı koymazdı giryân ol kerem kânı
Kabûl eylerdi 'özrü suçlulardan 'afv ü lutfuyla
'Azîmü'l-hulk idi şefkatli hannân ol kerem kânı
Gınayı sevmeyüp fakrı severdi fahr ederdi hem
Kılup miskînleri kendüye ihvân ol kerem kânı
Yamalıklar diküp esvâbma nâleyn giyüp dahi
Varup her hastaya eylerdi dermân ol kerem kânı
Hem ehl-i beytinin hizmetlerin bizzât ederdi hoş
Kamu müşkilleri eylerdi âsân ol kerem kânı
Eğer hubz-i şaîr mercimek çorbası ekliyçün
Olunsa da'vet olurdu o mihmân ol kerem kânı
Binerdi geh deve geh at ü geh katır gehi merkeb
Yalın ayak yürürdü kâh o sultân ol kerem kânı
Murabba' otururdu ya diz üzre ya dikerdi diz
Dolu âdâb idi peydâ vü pinhân ol kerem kânı
Yiyüp üç parmağıyla hem yalardı anı lezzetle
İçerdi üç nefesde âb-ı reyyân ol kerem kânı
Severdi bal ü helvâ hem kabak sirke tirit ammâ
Doyunca yememişdi arpadan nân ol kerem kânı
Mübârek karnına taş bağlar idi gâhi açlıkdan
Fuâdım olmasın der idi lerzân ol kerem kânı
Sa'âdet-hânesinde nice aylar yanmaz idi od
Kanâ'atle yer idi temr ü rummân ol kerem kânı
Güzel işlerde sağ yanın severdi eyleyüp takdîm
Vudûya olsa ya lübse şitâbân ol kerem kânı
Yatardı sağ yanı üzre yüzü müstakbelü'l-kıble
Ederdi her nefesde gaybı seyrân ol kerem kânı
Firâşı sahtiyân idi içi lif yastığı dahi
Gece yatsa az uyurdu o yakzân ol kerem kânı
Uyurdu gözleri hiç uyumazdı gönlü Dost ile
Ezelden hüsnüne olmuşdu hayrân ol kerem kânı
Hevâdan söylemezdi nutk-ı pâki cümle vahy idi
Dürr-i hikmetle idi bahr-i 'ummân ol kerem kânı
Teni halk içre idi gönlü Dost'uyla tek ü tenhâ
Bulurdu vahdeti kesretde her ân ol kerem kânı
Salât ü çok selâm olsun ona hem âl ü sahbına
Ki kıldı onları kendüye yârân ol kerem kânı
Gel ey Hakkı unut halkı Habîb-i Hakk'dan al hulku
Ki Hakk'dan hüsn-i hulk almışdı meccân ol kerem kânı
Erzurumlu İbrahim Hakkı
Kuddise Sırruh