Her Kim ki Diler Eyleye Tebyîn-î Hakîkat
29 Nisan 2019 tarihinde yayınlanmıştır.
NUTK-İ ŞERÎF
Her kim ki diler eyleye tebyîn-î hakîkat
Dü dîdesini nûr ile tezyîn-i hakîkat
'Aynına erişip keşf ile ta'yîn-i hakîkat
Tahmîn ile kâbil mi ki ta'lîm-i hakîkat
Ehlinden alır 'aşk ile dûrbîn-i hakîkat
Aslından alır şevk ile telkîn-i hakîkat
"Ve'l-leyl"de "ve't-tekâ" ile "etkâ" yı dilerse
"Ve'ş-şemsi duhâ" sırrı ile berki dilerse
Esrâr-ı "ev ednâ" kerem-i 'aşkı dilerse
Nefsin bilerek ma'rifet-i Hakk'ı dilerse
Ehlinden alır 'aşk ile dûrbîn-i hakîkat
Aslından alır şevk ile telkîn-i hakîkat
İmkân ü vücûb sırrını tefrîk ise maksûd
Fark ile cem' sırrını ta'mîk ise maksûd
Nâsût ile lahûtunu tevfîk ise maksûd
Taklîdini tahkîk ile tetkîk ise maksûd
Ehlinden alır 'aşk ile dûrbîn-i hakîkat
Aslından alır şevk ile telkîn-i hakîkat
Seyreylediği cümle mezâhirde nigâhı
Mahv eyleyerek perde-i nâsût-i sivâhı
Dilerse şuhûd-i netk-ı sırr-ı ilâhı
Zâhir görerek cümle mezâhirde kemâhı
Ehlinden alır 'aşk ile dûrbîn-i hakîkat
Aslından alır şevk ile telkîn-i hakîkat
A'yân-ı ilm sûreti hilkatde talebdir
Kurbiyyete bâdî-i mürâ'at-ı edebdir
Telkîn ise bir vâsıta-i kurba nesebdir
Her bir sebebi sanma hakîkatde sebebdir
Ehlinden alır 'aşk ile dûrbîn-i hakîkat
Aslından alır şevk ile telkîn-i hakîkat
Gencîne bulan kenzini pinhân eder elbet
Sırdâşa eren sînede mihmân eder elbet
Sermâyesini fakr ile yeksân eder elbet
Müstağrak olup katrayı 'ummân eder elbet
Ehlinden alır 'aşk ile dûrbîn-i hakîkat
Aslından alır şevk ile telkîn-i hakîkat
İhlâsa erer hâlis-i tevhîd-i 'amelde
Matlûbu bulur tâlibi taksîm-i ezelde
"Lâ"dan elem-i seyr ile "illâ"ya emelde
Vahdet ise maksûd bu kühistân-ı milelde
Ehlinden alır 'aşk ile dûrbîn-i hakîkat
Aslından alır şevk ile telkîn-i hakîkat
Esrâr-ı hakîkat olamaz cümle kese fâş
Şemsi göremez çıksa dahî dîde-i huffâş
Cânânsa emel bezl ederek râhına cân bâş
'Aşk ile olup cânını cânânına ferrâş
Ehlinden alır 'aşk ile dûrbîn-i hakîkat
Aslından alır şevk ile telkîn-i hakîkat
Yanıklara Sâmî açılır keşf ü kerâmet
Lâyıklara ihsân edilir bahş-ı se'âdet
Sâdıklara elbette verir nef'i sadâkat
'Âşıklara 'aşk elbet eder vasla delâlet
Ehlinden alır 'aşk ile dûrbîn-i hakîkat
Aslından alır şevk ile telkîn-i hakîkat
Şeyh Abdurrahmân Sâmî Saruhânî
Kaddesallahu Sırrahu'l-Âlî