Her Kime Kim Bir Nefes Aşk Selâm Eyledi
19 Haziran 2024 tarihinde yayınlanmıştır.
NUTK-İ ŞERÎF
Her kime kim bir nefes 'aşk selâm eyledi
Gönlü ulaşdı Hakk'a canda makâm eyledi
Sevdi 'inayet anı hidâyet buldu canı
Canını ol 'âşıkın oda harâm eyledi
'Aşk gibi kimiya bulmadı hiç evliyâ
'Âşık olan bî-riyâ nefsi gulâm eyledi
Ol cihâna gitmeğe cehd ü cihâd itmeğe
Canları esritmeğe 'aşkı müdâm eyledi
Dâr-ı belâdır cihân renc ile genci nihân
Yûsuf'a zindânı 'aşk dârü's-selâm eyledi
Ey nice ham âdemî 'aşk ile buldu demi
Nefse uyan puhteler kendüyi hâm eyledi
Kimesne nefsi zebûn kılmadı ey zû-fünûn
Demiri od kaynadır 'aşk anı râm eyledi
'Aşk ile Mûsâ kelîm 'aşk ile Îsâ kerîm
'Aşk ile Hakk Ahmed'i bahr-ı kelâm eyledi
Maksûdun Eflakî'nin bir nazar eyle bugün
Kutb-ı cihân Mevlânâ virdi tamâm eyledi
Eflâkî Dede
Kuddise Sırruh