Hudâ Göster Tapuna Doğru Bir Râh
17 Ekim 2021 tarihinde yayınlanmıştır.
NUTK-İ ŞERÎF
Hudâ göster tapuna doğru bir râh
Bulup vuslat olam ben hâk-i dergâh
Cemâlin nûru pür-nûr itse kalbi
Gözüme zerre gelmez mihr ile mâh
Virür kalbe safâlar zikr-i Mevlâ
Gönülden idelüm di'n Allâh Allâh
Murâd olan şühûd-i zât-ı Hakk'dır
Gerekmez hûr ü kasr ü cennet ü câh
Pür-âteş kalb-i 'âşık nûr-i Hakk'dan
Yakar iki cihânı kılsa bir âh
Gönül kâni' değil bir kez şühûda
Murâdı bu tecellî ola her gâh
Eğer sa'y eylesem bin yıl 'abesdir
'İnâyet irmez ise senden ey Şâh
Hidâyet olmasa ger vuslat olmaz
'İbâdet eylesen ger sâl ü pencâh
Bu dünyâ 'izzetine aldananlar
Yarın anlara câhı olusar çâh
Olar kim bilmedi maksûd-i hilkat
Cihânı anladı anlar çerâgâh
Kulûb-i evliyâdır leys-i gâlib
Nüfûs-i ehl-i dünyâ oldu rûbâh
İğende kendini dünyâya virme
Anadur sen dahi Mevlâ'yı geh gâh
Niçün kılmazsın ahvâlin tedârik
Bilirsin hod cihândır bir güzergâh
Uyan gafletden ey yâr-i 'azîzim
Geçer kılmaz karârı 'ömrü kûtâh
Utan Hakk'dan eyâ 'âsî siyeh-rû
Uyup nefsine her dem olma gümrâh
Düriş hayr işi te'hîr itme bir dem
Aman virmez ecel irerse nâgâh
Tazarru' eyle Mevlâ'ya gönülden
Kamu tâliblere oldur yine hemrâh
Bi hamdillâh Hudâyâ kıldın ihsân
İdüp esrâra 'Ârif hâle âgâh
Ahmed Efendi
Kuddise Sırruh