Hudâ'ya Hamd ü Şükr Olsun Bize İtdi Ulu İhsân
10 Mayıs 2024 tarihinde yayınlanmıştır.
NUTK-İ ŞERÎF
Hudâ'ya hamd ü şükr olsun bize itdi ulu ihsân
Kerem bâbın açuban çok ni'am bahş itdi ol Mennân
Ki cümle enbiyânın efdaline eyledi ümmet
Ne devlet ne sa'âdetdür ki virdi ol 'Azîmü'ş-şân
Harec yok dînimizde ecr-i nûr on katdır anlardan
Yazılır bir günâha bir ne denlü var ise 'isyân
'Azâba müstahak olsak dahi lutf ile setr eyler
Ki bir ismi anın Settâr biri Gaffâr biri Hannân
Bizi dahi kamu ümmetler üzre eyledi tafdîl
'İbâdetde 'umûrda vâr ise de bizde çok noksân
Menîden halk idüp bizi bu hey'etde çün ol Hallâk
Virüp hem bunca ni'metler kodu adımızı insân
Gelin ey suçlu kardaşlar idelim tevbe istiğfâr
Sürüp hâke siyâh yüzlerimizi olalım nâlân
Bu dünyânın işi on kat güç iken emr-i ahretden
Dürüşürüz bu güç işe dimeyiz kim sonu hüsrân
Tecâvüz eyledik hadden uyup İblîs'e Kuddûsî
Meğer cürmümüzü 'afv eyleye ol fazlı bol Rahmân
Ahmed Kuddûsî
Kuddise Sırruh