Hulûs-ı Kalb İle Tâat İdüp Zâhid Riyâdan Geç
4 Temmuz 2024 tarihinde yayınlanmıştır.
NUTK-İ ŞERÎF
Hulûs-ı kalb ile tâ'at idüp zâhid riyâdan geç
Şerâb-ı 'aşk ile ser-mest olup çûn u çerâdan geç
Bulup kalb-i selîmi mâl u câh-ı bî-behâdan geç
Bırak lâf u güzâf-ı bî-mezâkı iddi'âdan geç
Dehân üzre urup mühr-i sükûtu müdde'âdan geç
Erenler kalma taklîd içre vaz'-ı nâ-revâdan geç
İrüp tahkîka bul tevhîd-i Mevlâ'yı sivâdan geç
Tarîkatde tedârik her ne rütbe eylesen sohbet
Fütûhât u Fusûs u Hikmet ile eylesen ülfet
Lisânınla idersin vahdet-i Hakk'ı hemân müsbet
Mukarrerdir yine sende serâser perde-i gaflet
Vücûd-ı Vâhid'i vicdân içün rü'yet gerek rü'yet
Erenler kalma taklîd içre vaz'-ı nâ-revâdan geç
İrüp tahkîka bul tevhîd-i Mevlâ'yı sivâdan geç
Olar kim rü'yet-i dîdârı bilmez mest-i gafletdir
Sanırlar rütbe-i 'ilme'l-yakîni 'ayn-ı rü'yetdir
Behey gâfil 'ilm başka vu rü'yet başka hâletdir
Olur mu 'ayn-ı mesmû' ol ki meşhûd-ı basîretdir
Düşüp nîrân-ı hicrâna sanırsın bâğ-ı vuslatdır
Erenler kalma taklîd içre vaz'-ı nâ-revâdan geç
İrüp tahkîka bul tevhîd-i Mevlâ'yı sivâdan geç
Erenler kim velâyet kişverinde oldular sultân
Kimisi Şeyh-i Ekber'dir kimisi Sadruddîn-'unvân
Yazup bir 'ilmi anlar tutalım sen eyledin îkân
Alırsa anlar ol 'ilmi eğer fark idelim bir ân
Ne kalır sende insâf it idüp Allah içün iz'ân
Erenler kalma taklîd içre vaz'-ı nâ-revâdan geç
İrüp tahkîka bul tevhîd-i Mevlâ'yı sivâdan geç
İdersin sûret-i irşâdda iğfâl-i dünyâyı
Düşünmezsin suâl-i mahşer ü ta'zîb-i 'ukbâyı
Olup müşrif o dem kim zevk idersin haşr-ı sugrâyı
Şuûrundan ider zâil Hudâ ol 'ilm-i ra'nâyı
Kalup mânend-i hayvân idemezsin zikr-i Mevlâ'yı
Erenler kalma taklîd içre vaz'-ı nâ-revâdan geç
İrüp tahkîka bul tevhîd-i Mevlâ'yı sivâdan geç
Eğer insân isen taklîd içinde düşme takyîde
Tarîk-i cüst ü cûda eyleyüp dâmân berçîde
Bulup bir merd-i Hakk'ı mahrem ol andan mevâcîde
Seni bir 'âleme îsâl ide kim görmemiş dîde
İrersin bî-ser ü pâ ol zamân tâ tavr-ı tevhîde
Erenler kalma taklîd içre vaz'-ı nâ-revâdan geç
İrüp tahkîka bul tevhîd-i Mevlâ'yı sivâdan geç
Tarîk-i vuslata ey Şems 'aşkı rehnümâ eyle
Vücûdun vârını nûr-ı tecellîde fenâ eyle
Bulup bir cism-i mevhûb-ı ilâhî pür-safâ eyle
Temâşâ-yı diyâr-ı lâ-sabâh u lâ-mesâ eyle
Nigâh-ı çeşmini hayret-rehîn-i Kibriyâ eyle
Erenler kalma taklîd içre vaz'-ı nâ-revâdan geç
İrüp tahkîka bul tevhîd-i Mevlâ'yı sivâdan geç
Osman Şems Efendi
Kuddise Sırruh