MuzafferOzak.com (Türkçe)

NASÎHAT

İbtidâ 'âşık isen sırrına bir mahrem bul

Ba'dezîn bu dil-i mecrûha devâ merhem bul

Teşne olma bu cihân vârına hoş 'âlem bul

Sâbit ol kavline her demde dem içre dem bul

Cehd edüp Ka'be-i maksûdunu ara hem bul

Hâsılı zümre-i 'irfana karış âdem bul

Hızr-veş geç zulumatı içegör âb-ı hayât

Dâmenin destine almış geziyor peyk-i memât

Zel-veş rîş-i sefîdinden utan bul derecât

Rüstem olsan sana göstermeye devrân sebât

Zahmet-i mevti çeker her kişi yok zerre necât

Sen gönül 'ârif isen derdin içinde em bul

Şöhret-i devlet-i dünyâya sakın aldanma

Sûret-i zînet-i 'unvân ile bâkî sanma

Zarar-ı fâizi bil âteş-i gabna yanma

Tâhir ol bu zen-i dehrin sözüne inanma

Zâhiren etdiğin işden dün ü gün utanma

'Ayn-ı ibretle bak âyîne-i dehri kem bul

Gayret et râh-ı muhabbetde gönül şâm u seher

Fikr edüp menzil-i maksûda eriş eyle eser

Kısmetin verdi çü kassâm-ı ezel çekme keder

Kerem ü lutf-ı Hudâ'dan dile ey ehl-i hüner

Lutf u ihsân u kerem gayriden istersen eğer

Menba'-ı cûd-ı gınâ dehrde bir hâtem bul

Nâ-ümîd olma Hudâ'nın dün ü gün rahmetine

Varmaz 'aklı kulun 'âlemde Hakk'ın hikmetine

Herkesin aslını sorma nazar et 'izzetine

Lâ-cerem verme gönül fânî cihân zînetine

Yak çerâğ-ı himemi fakr u fenâ devletine

Feyzîyâ bezm-i kadeh-bahşına bir hemdem bul

İbtidâ Âşık İsen Sırrına Bir Mahrem Bul