İlâhâ Pâdişâhâ Dil-nüvâzâ
4 Haziran 2022 tarihinde yayınlanmıştır.
MÜNÂCÂT
İlâhâ pâdişâhâ dil-nüvâzâ
Kerîmâ müste'ânâ çâre-sâzâ
Benem ol bir sabî destimde şîşe
Bana her câya bakmak oldu pîşe
Ayağım kildedir beyhûde reftâr
Tabâyi' çâhı var yolumda bisyâr
Bu şîşe içredir bâr-ı emânet
Bana olmazsa ger senden 'inâyet
Tabî'at çâhına düşmekdir işim
Sınarsa şîşe ger onar mı başım
Sana kim ilete senden yana râh
Hidâyet olmasa ger ona hem-râh
Ayağım sâbit et râh-ı fenâda
Bana 'avn eyle olmayam fütâde
Müyesser kıl bana kudretden akdâm
Sırât-ı müstakîme edem ikdâm
Eğerçi müntehâsı her tarîkin
Cenâbındır recâsı her ferîkin
Beni ırma sırât-ı müstakîmden
Beni hıfz eyle her râh-ı sakîmden
Zemîme hâr u hâşâkin yolumdan
Gider yolda koma kaldır elimden
Cenâbındır be-her-câ ittikâlim
Sana mahfî değildir za'f-ı hâlim
Çü sensin dest-gîri her za'îfin
Çü sensin çâre-sâzı her nahîfin
Bu Şemsî haste-dil bî-çâre gamnâk
Kapında halka-zendir mâ 'arafnâk
Çü âlimsin Hudâyâ hasb-i hâle
Senin 'ilmin kifâyet her suâle
Şemseddîn Sıvâsî
Kuddise Sırruh