İlâhâ Pâdişâhâ Eylerem Minnet Sana Hâlâ
2 Haziran 2022 tarihinde yayınlanmıştır.
MÜNÂCÂT
İlâhâ pâdişâhâ eylerem minnet sana hâlâ
Her işde dest-gír ol 'avn-ı lutfunla bana hâlâ
Zünûbum bî-hadd 'ömr ise 'ubûr etmekde sür'atle
Sudûr eyler cehâletle niçe gûne hatâ hâlâ
N'ola yâ Rabb kabûl olsa ger istiğfâr ile tevbem
Ümîdim kesmezem senden umup 'avn u 'atâ hâlâ
Me'âŝîden ne denli ger keder-nâk oldu ise dil
İder ikrâr vahdâniyyetin subh u mesâ hâlâ
Yedi deryâ yedi yer gök kadar vâr ise ger cürmüm
Bihâr-ı rahmetinden çok değil yâ Rabbenâ hâlâ
Kerîm ü yâ Rahîm ü yâ Gafûr u yâ 'Afuvv Allah
'Afuvv ismin hakkıyçün eylerem 'afvın recâ hâlâ
Resûlün hürmetiyçün kıl ilâhî 'özrümüz makbûl
Habîbindir senin zîrâ o şâh-ı enbiyâ hâlâ
Çü sen Hallâk-ı 'âlemsin tabîb-i ümmetân oldur
Anınçün cümle derd ehli umar andan şifâ hâlâ
Diler her sâl u mâh hafta vü eyyâm her sâ'at
'Atâ vü raģmet ü lutfun bu Fazlî-i gedâ hâlâ
Seyyid Osman Fazlî Efendi
Kaddesallahu Sırrahu'l-Âlî