İlâhî Bir Alîlim Hadde Gelmez Cürm ü Isyânım
12 Ekim 2021 tarihinde yayınlanmıştır.
MÜNÂCÂT
İlâhî bir 'alîlim hadde gelmez cürm ü 'ısyânım
Esîrim nefse mağlûb olmuşum yok dilde sultânım
Mülevves hâneye konmaz ki şâh ey Rabb-i Rahmânım
'İnâyet senden olmazsa temizlenmez de Sübhânım
Günâhım çokdur ammâ tevbeler kıldım peşîmânım
Yanar âteşlere andıkça cürmüm kalb-i vîrânım
Senin mülkünde kim var başka duysun âh u efgânım
Dedin "lâ taknetû min rahmetillah" işte burhânım
Ümîdim sendedir yalnız beni 'afv eyle Gufrânım
'Afüvsün sen Gafûr isminle geç lutf et zünûbumdan
Sığındım hısnına kîn ü hased kibr ü 'ucubumdan
Sebebsiz halka buğz etdimse ondan bed-rükûbumdan
Çok âh-ı ins ü cinn aldım sen âzâd eyle hûbumdan
Lisânım lağvı söyler hep yoruldum lehv ü lu'bumdan
Ki ancak sen haberdarsın zuhûrumdan guyûbumdan
Aman Settârım âgâh olmasın kimse 'uyûbumdan
Sen imdâd eyle yâ Rabbe'l-'ulâ artmakda tuğyânım
Düşünmekden hatâyâ vü kusûrum gitdi iz'ânım
Kopardım kayd u bendim halka-i bâb-ı şerî'atden
Yazık bî-behreyim âdâb u erkân-ı tarîkatden
Ne mümkin feyzyâb olmak bu hâlimle hakîkatden
Nedir fikr etmedim bir dem ilâhî gâye hilkatden
Vücûdum şimdi sûzân olmada âlâm-ı firkatden
Soyundum bu ateşle 'âr u nâmûs u halîkatden
Erişmezse eğer bir nefha yâ Rab rahm u şefkatden
Karışmam gark-ı seylâb eyler 'arşı 'ayn-ı giryânım
Terahhumla nazar kıl hâlime ma'bûd-ı zî-şânım
İlâhî nefs-i emmârem mu'annid gelmez îmâne
Gücüm yetmez irâdem mahv eder geldikçe galyâne
Habîbin 'aşkına hıfz eyle fırsat verme şeytâne
Koyar iblîs ü nefsi dest-i kudret istenen şâne
Zafer-yâb eyle yâ Kahhâr iki kuvvetli düşmâne
Ferâset ver basîret ver şu gönlüm kılma bîgâne
Münâcâtım yürekden sen bilirsin bakma noksâne
Şu'ûrum 'akl u fikrim târumâr olmuş perîşânım
Evâmirden nevâhîden münezzeh şöyle 'uryânım
Ne mefrûzâtı hıfz etdim ne sünnetlerle şuğlüm var
Yürür zulmetde pâyim bilmeden bî-'ayn u bî-envâr
Tutan yok destimi râh-ı kader muzlim nefis bî-'âr
Kuşatmış her yanım vahşet saçan mühlik canavarlar
Elimde ihtiyârım yok ki istiklâle yâ Gaffâr
Esâret bağların ihlâl edip olsam me'a'l-ahrâr
Dönüp durmakdayım pür-havf u dehşet dilde istiğfâr
Ki ben gavvâs-ı bahr-ı gafletim hâbımda hayrânım
Hayâtım külli kâbûs artıyor gitdikçe buhrânım
Garîbim âşinâ yok hâlime hiç pür-keder düşdüm
Kalıp bî-tâb u tâkat pek ezildim derbeder düşdüm
Atar dostum da düşmânım da taş hep ta'n eder düşdüm
Sihâm-ı hükm-i devrân eyledi cismim heder düşdüm
Bugün bî-mâder ü bî-akribâ vü bî-peder düşdüm
Boğuldum bahr-ı gamda fitnelendim döndü ser düşdüm
Utanmam çünki takdîr-i ezelden şâheser düşdüm
Velâkin cân u ten bîmar bugün çâk-i girîbânım
Üzülmem yetse kuvvet pek çelimsiz cism-i biryânım
Hedefdir sînemiz biz kaçmayız a'dâ hücûmundan
Şehîd-i Kerbelâ neslindeniz yok bâkimiz bundan
Benim korkum ezel hükmüyle nefsin dâm-ı şûmundan
Cehennem korkusundan yâ cinân u hûr umudundan
Değil meyl-i 'ibâdât eylemem hâşâ huzûrundan
Bana bir kez kulum dersen çekinmem nâr-ı tamundan
Kosan Firdevs-i a'lâya na'îmin zevk-i tu'mundan
Mehabbet yoksa senden hazz alır mı rûh-ı nâlânım
Bunu fehm eyleyen 'uşşâka bin cânımla kurbânım
Mehâfetdir Hudâ'dan re's-i hikmet bu müsellemdir
Bu kavlin kâili Mahmûd-ı Ekrem Fahr-i 'Âlem'dir
Bu tahvîfin vürûdundan sahat maksûd u mu'lemdir
Mehabbet sırrını Mahbûb-i Hakk herkesden a'lemdir
Seven ma'şûkunun gönlündeki esrâra mahremdir
Darıltmak kaygusu yârin ona havf-i demâdemdir
Bunu en çok duyan 'aşk-ı mecâzda nesl-i Âdem'dir
Esâsen ehl-i tebşîr ehl-i inzârdan mükerremdir
Ledünnî sır verirsen yâ ilâhî arta nisyânım
Lisânım hıfz edip rahm et çoğaltma dilde tûfânım
İlâhî mahrem et esrâra ammâ samt u ebkem kıl
Bu yüzden ehl-i derdin derdine bizlerle merhem kıl
Ledünnî 'ilmin ihsân etdiğin Hızr'ınla hemdem kıl
Me'ânî tıflım insân eyle Kur`ân ile tev'em kıl
O tıflı rahle-i tedrîs-i Ahmed'den mu'allem kıl
Sunup iksîr-i 'aşkın feth-i kalb et şâd u hurrem kıl
Dil olsun münkesir ammâ ki dışdan, dâim ebsem kıl
Müfîd olsun meveddet ver de halka 'ilm ü 'irfânım
Hisâr-ı maddeden kurtar hür olsun fikr ü vicdânım
Bugün dehşet verir efkâr-ı gûnâgûn-ı istibdâd
Nice mazlûm ağızdan yükselir feryâd-ı istimdâd
Yıkılmış 'ırz u nâmus fikre gelmez şerden istib'âd
Eşirrâ her zaman ferhân e'izzâ rûz u şeb nâ-şâd
Ehâlî pür-teessür hâr u hasdan eyler istirşâd
'Adâvet sevgiye hâkim yok artık hayra isti'dâd
'İnâyet eyle Allahım kerem kıl hâlimiz berbâd
Dilerler ahz-ı feyz etmek bu mücrim kuldan ihvânım
Benim cürmümle ma'lûl olmasın ahbâb u yârânım
Ehibbâ-yı kirâmın vaz mı geçmiş bizden ey Mevlâ
Unutduk 'azm u cehdi kavlimiz hep leyte vü levlâ
Hased buğz u riyâ emrâzı etmiş arzı istîlâ
Bu zilletlerle imrâr-ı hayatdan ölmemiz evlâ
Tevellâdan teberrâdan geçir kıl rûhumuz i'lâ
Meded-res Ehl-i Beyt-i Mustafâ'dır âhir ü ûlâ
İzin ver kılsın anlar bizlere imdâd ve illâ
Halâs olmak ne mümkin fitnelerden yoksa Deyyânım
Helâk eyler bu 'âciz Hikmet'i şiddetli nîrânım
Ârif Hikmet Gökoğlu
Kuddise Sırruh