İlâhî İzzetin Hakkı Bize Sen Eylegil İmdâd

23 Haziran 2020 tarihinde yayınlanmıştır.

MÜNÂCÂT

İlâhî 'izzetin hakkı bize sen eylegil imdâd

Ki yokdur çâremiz aslâ bize sen eylegil imdâd

Cüyûş-ı nefs-i emmâre dahi iblîs-i pür telbîs

Havâle oldular cümle bize sen eylegil imdâd

Bi-hamdillah tahassun eyledik biz hısn-ı tevhîde

Bunlara gâlib olmaya bize sen eylegil imdâd

Senindir kal'a-i burc-i beden cümle mühimmât hem

Muhâfız olmaya bunlar bize sen eylegil imdâd

Yapan sensin bu kal'ayı düzen sensin mühimmâtı

Ki nâzırsın ana dâim bize sen eylegil imdâd

Senindir şevket ü nusret senindir kuvvet ü kudret

Kurupsun tahtgâhını bize sen eylegil imdâd

Ne varsa cümle senindir bu sûret 'âriyet olmuş

Anı bozdurma a'dâya bize sen eylegil imdâd

Düzülmüş ahsen-i tasvîr ki mi'mârı anın sensin

Anı ta'mîr ü takvîme yine sen eylegil imdâd

Eğer bakmaz isen hâşâ 'ıyâl evlâd esîr olur

Eder a'dâ anı yağmâ bize sen eylegil imdâd

Hücûm edüp girer a'dâ bu tahtgâh-ı sultâna

Düşerse şânına bilmem yine sen eylegil imdâd

Bu iklîmde defâin hem hazâin vâr iken mevcûd

Mahalline anı sarfa bize sen eylegil imdâd

Bu Sûzi hasb-i hâlin çün cenâba 'arz-ı hâl etdi

Kerem lutf ile sâhib ol ana sen eylegil imdâd

Ahmed Sûzî

Kuddise Sırruh