İlâhî Tahtgâh-ı Dilde Sensin Pâdişâh Ancak
10 Haziran 2021 tarihinde yayınlanmıştır.
NUTK-İ ŞERÎF
İlâhî tahtgâh-ı dilde sensin pâdişâh ancak
Vücûd iklîmine cünd-i hayâlindir sipâh ancak
Uyup nefs-i hevâya yolda kaldım destgîrim yok
Nesîm-i feyz-i cûdundur bana hâdî-i râh ancak
Hebâ oldu riyâ vü 'ucb ile a'mâlim ü ef'âlim
Benim zühd ü 'ibâdet sandığım cürm ü günâh ancak
Mecâlim yok rehâyâb olmağa a'dâ-yı kesretden
Der-i devlet-medârındır bana püşt ü penâh ancak
Ağardı subh-i kâzib gibi mûyum hâb-ı gafletde
Ne 'ilmim var ne a'mâlim hemân rûy-i siyâh ancak
Rızâ'nın zikr ü fikri bâb-ı lutfunda kerem kânı
Demâdem dilde eyvallah u serde külâh ancak
Neccârzâde Rızâ Efendi
Kuddise Sırruh