İmâm Hüseyn Efendimizin Râyihası ve Mevlûd-i İmâm Hüseyn Âdeti
6 Kasım 2015 tarihinde yayınlanmıştır.
"Ulemâ-yı sîyer-i nebî kavilleri üzre Hazret-i Risâlet'den mâ‘adâ sâir enbiyâ aleyhimüsselâm ayva râyihası gibi kokarlarmış. Ammâ bizzât Hazret-i Risâlet-penâh ke-râyihati'l-verdi'l-ahmer imiş derler. Ve râyihati'l-melâ’ike aleyhimüsselâm ke-râyihati't-tüffâh demişler, bi-kavli ahâlî-i Malatıyye...
Ve râyiha-i Ebâbekri's-sıddîk radıyallahu anh ke-râyihati'l-bıttîh, bi-kavli ahâlî-i Diyârbekir.Ve râyiha-i Ömerü'l-fârûk radıyallahu anh ke-râyihati'l-anber, bi-kavli ahâlî-i Hind.Ve râyiha-i Osmân Zi'n-nûreyn radıyallahu anh ke-râyihati'l-benefsec, bi-kavli ahâlî-i Belh.Ve râyiha-i Alîyyü'l-Murtezâ radıyallahu anh ke-râyihati'l-yâsemen bi-kavli ahâlî-i Irâk-ı Acem.Ve râyiha-i İmâm Hasan radıyallahu anh ke-râyihati'l-karanfil, bi-kavli ahâlî-i Şâm-ı cennet-meşâm"Bundan sonra Mısır ahâlîsinin beyânına göre İmâm Hüseyn Efendimizin râyihasının beyaz gül (verdi'l-ebyaz) olduğunu şu tafsîlât ile beyân ediyor :
"Ve râyiha-i İmâm Hüseyin radıyallahu anh ke-râyihati'l-verdi'l-ebyaz, bi-kavli ahâlî-i Mısr-ı ümmü'd-dünyâ. Zîrâ Hazret-i Hüseyn'in ser-i sa‘âdetin Yezîd Mısır'a gönderüp Mısır'da Hân-ı Halîl kurbünde Meşhed-i İmâm Hüseyn nâm makâm-ı azîmde ser-i sa‘âdet-i Şehzâde Hüseyn anda medfûndur. Mâh-ı Muharrem-i harâmın onuncu günü Kerbelâ'da şehîd olduklarından yine kabr-i şerîfinden yine ol günlerde meşhed-i münevveresinden taşra beyâz verd-i hândân râyihası cemî‘i züvvârânın dimâğların mu‘attar ederdi"
 |
| Kâhire'de İmâm Hüseyn Efendimizin re's-i mübârekleri için yapılan türbe |
Burada Evliyâ Çelebi {Der-beyân-ı sitâyiş-i Mevlûd-i Meşhed-i İmâm Hüseyin radıyallahu te‘âlâ anh} diye bir başlık açarak Çelebi Abdurrahman Paşa'nın Mısır'da vâli iken ihdâs ettiği Mevlûd-i İmâm Hüseyn âdetini tafsîlatı ile şöyle anlatıyor :
"Âhir sene "gânim" lafzı târîhinde, sene 1091, Çelebi Abdurrahmân Paşa vâlî-i Mısır iken cemî‘i ulemâ-yı Mısır ve fuzalâ-yı câmi‘-i Ezher, Abdurrahmân Paşa huzûruna gelüp merkad-i İmâm Hüseyn'de yevm-i âşûrada üç gün beyâz gül râyihası şemm olunduğun şehâdet etdiklerinden ol vezîri hüsn-tedbîr hüsn-i hulku gibi hüsn-i hayr edüp Haremeyn-i Muhteremeyn'den beher sene mâh-ı muharremde İmâm Hüseyin üzre on kazgan âşûra pişüp fukarâya bezl olunmasın müretteb eyledi ve kendü mâlından altı bin pâre müretteb edüp iki batman öd ve bir kantar şem‘-i asel ve bir kantar sükker-i mükerrer ve üç kantar kanâdîller içün zeyt-i hâr vakf eyleyüp mâh-ı âşûranın onuncu gecesi mevlûd-i İmâm Hüseyin olmağı müretteb eyledi ve kazaskere hitâben buyurdı-i şerîf verüp Mevlûd-i Nebî gibi Mevlûd-i İmâm Hüseyn gecesi cemî‘i minâreler ve cemî‘i çârsû-yı bâzârlarda ve cemî‘i mahallât şâhrâhlarında kanâdîller ile minâreler ve dekâkînler çerâğân olmağı fermân edüp şehr-i Mısır içre bir Mevlûd-i İmâm Hüseyn olmuşdur kim gûyâ Leyle-i Kadr idi ve kendü ihsânları olan İmâm Hüseyin'in yeşil destâr-ı Muhammedîsini paşadan cemî‘i şürefâ ve nakîbü'l-eşrâf ve ulemâ-yı Câmi‘-i Ezher alup bir alây-ı azîm ile destâr-ı şerîfi re’s-i şerîf-i İmâm Hüseyn'e sardılar. İlâ hâze'lân bu mevlûd-i şerîf Çelebi Abdurrahmân Paşa'nın hayrât u hasenâtıdır. Bu mevlûd-i şerîfde hâzır olan ihvân-ı vefâya zâhir ü bâhirdir kim ol leyle-i mübârekelerde İmâm Hüseyn'in kabr-i münevverelerinden beyâz verd-i hândân râyihası istişmâm olunur"