İmâm-ı A'zam-ı Fahru'l-Irâkeyn
20 Şubat 2022 tarihinde yayınlanmıştır.
Na't-ı Hazret-i Nu'mân
Aleyhi'r-Rahmetü ve'r-Rıdvân
İmâm-ı A'zam-ı fahru'l-Irâkeyn
Hümâm-ı efham-ı garbeyn ü şarkeyn
Fekâhat leşkerinin husrevidir
Hidâyet kârbânı peyrevidir
Şerî'at bûstânında semerdir
Tarîkat âsumânında kamerdir
Ma'ârif süfnünün oldur şirâ'ı
Tutup elde dumânın oldu dâ'î
O'dur sâbık bu râh-ı ictihâda
O'dur sâ'k gürûh-ı inkıyâda
Binâ-yı şer'a oldu tâze mi'mâr
Esâsın muhkem etdi çâr-dîvâr
Berâhîniyle kıldı ref'-i erkân
Şerâyi' mahzeninde açdı dükkân
Mesâilden getirdi çok şiyâ'ı
Alup ruhsâr-ı ma'nîden kınâ'ı
Riyâz-ı şer'in olup bâğbânı
Kılâ'-ı dehrin oldu pâsbânı
Gürûh-ı ümmetin olup sirâcı
Karâr etdi bu cem'in onda tâcı
Ne turfe etdi gör dîne esâsı
Kitâb u sünnet icmâ' u kıyâsı
Bu devr üzre kuruldu sakf-ı merfû'
Kimin var böyle şer' u dîn-i matbû'
Ki çâr-erkân ferâyizle müberhen
Olupdur nakl u vâcible müzeyyen
Ona müstahsenât kandîl ü misbâh
'Aceb câmi' değil mi sun'-ı Fettâh
Dürüşdü buna mi'mâr oldu Nu'mân
Likâsıyla ivazlar vere Rahmân
İmâmeyn-i hümâmeyn iki server
Ebû Yûsuf Muhammed kodular ser
İmâm'dan oldulardı çünki me'zûn
Bular da etdi bunda sa'y-i efzûn
Bizim-çün çekdilerdi çok riyâzât
Kılup nâsdan mesâil iktibâsât
Çü dîn emrinde server buldu temkîn
Dürüşdü kıldı tedvîn-i kavânîn
Bunu sanma ki kânûn-ı devâdır
Velî emrâz-ı dîn içün şifâdır
Çü kıldı bize bu vaz'-ı şerîfi
'Ayân oldu bu dem dîn-i Hanîfî
Mezâhibden budur düşen muhacce
Derim âtîde sana nice hucce
Şemseddîn Sıvâsî
Kuddise Sırruh