İşâret-i İlm - Sinan Paşa
1 Şubat 2022 tarihinde yayınlanmıştır.
İŞÂRET-İ 'İLM
Ey girâmî-gevher ü 'âlî-neseb
'İlm niçin eylemezsin sen taleb
Cehl ile çün mürdedir âb ü gilin
'İlm oku ki hayy ola cân ü dilin
Meh gibi 'âleme tâbân olasın
Gül gibi her demde handân olasın
'İlm ile olsa 'amel bir genc olur
Olmaz ise 'ilm kuru renc olur
'İlmdir bünyâd ü tâ'at hânesi
Üssü olmazsa n'olur kâşânesi
'İlm sen şol ıstılâhı sanmagıl
'İlm okudum diye ona kanmagıl
Kıyl u kâl ile bulunmaz râh-ı hak
Kâle kalanlar olur gümrâh-i Hakk
'İlm-i zâhirde belî olgıl emîr
Kim gıdâ-yı tıfl olur evvelde şîr
'İlm-i kesbî olmaz ise hâsılın
İlm-i zevkî hâsıl etmez hem dilin
Lîk kalma onda geçgil ilerü
Nice bir tıfl olasın sen şîr-cû
Var bihâr-i kudrete gavvâs ol
Var künûz-i hikmet içre hâss ol
Ger kalasın 'ilm-i zâhir içre pes
Sen leb-i deryâda olasın meges
Ger reh-i ma'nâda dânâ olasın
Dopdolu sen dürr-i deryâ olasın
Ol ki olur 'ilm-i dînden behremend
Dü cihânda ser-firâz ü ser-bülend
'İlm-i sûret pîşe-i tendir hemân
'İlm-i ma'nâ san'at-i cân ü revân
Nakş sûretdir ko sen nakkâşı gör
'Âlemin ferşin ko sen ferrâşı gör
Bendegî tâ'at durur pindârı ko
'İlm hem bilmek durur güftârı ko
'Aşk erinin bil havâssı gayr olur
Bülbül-i cânın nevâsı gayr olur
Tab'a bir ilhâm-i Rabbânîdir ol
Câna bir telkîn-i rûhânîdir ol
Bu benim hâlim değildir söylerim
Ehl-i hâlin sözlerin nakl eylerim
Sen beni ko dediğimi dinlegil
Issını ko sözünü gey anlagıl
Ben dahi bir 'âciz ü bîçâreyem
Bu hevânın derdiyle âvâreyem
Ne bilirem neyleyim nice edem
Ne bilirem kanda varam ne edem
Hayret aldı içim ü dışım benim
Bilmez oldum ben benim n'ideceğim
'Akl ile tut bilirim n'itmek gerek
Lîk bir cezbe gelip çekmek gerek
Derdimiz çok varalım maksûda biz
Yalvaralım ya'nî ol ma'bûda biz
Ola kim lutf eyleyip gufrân ede
Râh-ı hakkı biz kula âsân ede
Dünyede aça gönül gözünü ol
Tâ açıla onda dahi doğru yol
Dîde-i bâtın eğer bînâ ola
Nice sırlar göz göre peydâ ola
Sırr-ı vahdet zâhir olur bî-gümân
'Ayn-ı 'ilm ol vakt olur bilgil 'ayân
Genc-i Hakk'a cânı mahzen hem emîn
Bu olur dîbâce-i hakka'l-yakîn
Çün hakîkat bahrına ol reh bulur
Gevher-i maksûdunu nâ-geh bulur
Ey gül-i handân koma sen reng ü bû
Ger edersen sen tecerrüd ârzû
Murg gibi beste-i dâne olma sen
Mübtelâ-yi hîş ü bîgâne olma sen
Nakşını mahv eyle ondan aç varak
Tâ okuna âyet-i isbât-i Hakk
Şol gönül kim olmadı 'aşkı dürüst
Geh kavî olur geh olur gine şüst
Murg-ı vahdet geh gehî dilde uçar
Berk-veş lâkin karâr etmez uçar
Bülbül-i cân gâh geh perrân olur
Geh güler dil geh yine giryân olur
Geh cemâl-i yâr keşf eyler nikâb
Geh celâl-i 'izzeti kılar hicâb
Düşe kalka ol gönül tâlib olur
Gâh mağlûb ü gehî gâlib olur
Ol ki sâhib-hâl olur nâmı anın
Hakk iledir her dem ârâmı anın
Şol ki enîsi olur anın ol Hudâ
Bahr-i temkîn olur u dürr-i fenâ
Sinan Paşa
Rahmetullahi Aleyh