MuzafferOzak.com (Türkçe)

NUTK-İ ŞERÎF

İster isen ref'-i nikâb varlık ile olmaz nasîb

Envârına feth ola bâb ders-i 'arefden ol lebîb

Bî-müddet ü mâh u sinîn vahdetde olmuşken mekîn

Bezm-i ezel 'ahd-i metîn aldı seninle ol Habîb

Feyz-i ezel ihsân edip hep rûhları yeksân edip

Hil'at ile insân edip etdi bu iklîmde garîb

Giydirdi bu câna teni setr eyledi vahdetini

Seyr etmeğe senden seni cân mülküne oldu rakîb

Feyz oldu sûret resmine mevc-i müsemmâ ismine

Râm oldu sîret hükmüne fermân edip Zât-ı Mücîb

Gerçi hayâtın tendedir cânın da Hakk'la zindedir

Âyîne ol Yâr sendedir senden sana oldur karîb

Hâk-i reh ol Hakk yoluna Hakk arayana bulana

Va'd eylemişdir kuluna aslın bulan olur necîb

Seyrânın esfelle ulâ geç esfeli bul i'tilâ

Kalbe verir illâ cilâ dil mülkünü eyle hezîb

'Aks-i celâl nefs ü hevâ terk eyleyen buldu devâ

Mahrûm eden hep mâsivâ meyl eyleyip olma ferîb

Sâmî alınca hoş haber cânâneden gitdi keder

Ma'şûka erişen meğer ma'nâda olanlar edîb

Şeyh Abdurrahmân Sâmî Saruhânî

Kaddesallahu Sırrahu'l-Âlî

İster İsen Ref'-i Nikâb Varlık İle Olmaz Nasîb