İtdi Teşrîf Çün Cihânı Hâtem-i Hayrü'l-Beşer
22 Ocak 2023 tarihinde yayınlanmıştır.
NA'T-I ŞERÎF
İtdi teşrîf çün cihânı hâtem-i hayrü'l-beşer
Oldu nûruyla münevver cümle 'âlem ser-te-ser
"Küntü kenz"in sırrını 'âlemlere kıldı 'ayân
Zümre-i ervâha rûhu ol zamân ki virdi fer
Yüzü anın "ve'd-duhâ" "ve'ş-şemsi" "ve'l-leyli" saçı
İtdi Kur`ânda kasem Hakk çün ki oldur mu'teber
Tâc olupdur pes "le 'amrük" hil'ati levlâk anın
Oldu illâ "rahmeten-lil-'âlemîn" ana kemer
Bulmadı yol kurbet-i hazretde kimse şânına
Oldu dâim "lî ma'allâh" halveti ana makarr
Kalbi anın görmedi gaflet hicâbın bir nefes
Anın içün didi Hakk hakkında "mâ zâga'l-basar"
İt kıyâs barmaklarından mu'cizâtın gayrısın
Çeşme akdı her birinden eyleyüp şakku'l-kamer
Sanma bu milke hemân mahsûs ola hükmü anın
On sekiz bin 'âleme hükmü irer ger huşk ü ter
Halka irgürmekde feyz-i Hakk'ı rûhu vâsıta
Kıldı ise zâhiren gerçi bu 'âlemden sefer
Ger şefâ'at eylesin dir isen ol şâh-ı rusül
Kıl ri'âyet sünnetin ol hizmetinde hâk-i der
Âsitân-ı 'âlî-şânın kıble-i cân idegör
Sırr-ı pâkinden irişe sırrına tâ ki eser
Ol giyer tâc-ı şefâ'at hem kabûlin hil'atin
Şol zamânda kim halâyık ideler eyne'l-mefer
Vuslat-ı Hakk oldu çün ki müntehâ mi'râcına
Geçdi yetmiş bin hicâbı ol ke lemhin bi'l-basar
Rehber oldı sidreye dek gerçi kim Rûhu'l-emîn
Kaldı Cibrîl enbiyâ ervâhı ol kıldı güzer
Eşref-i evlâd-ı Âdem menba'-ı cûd u kerem
Dîn-i bâkî da'vetin 'âmm eyledi der-bahr ü berr
Yâr-ı evvel yâr-ı gârı Bû Bekir Sıddîkdır
Şâhid oldu sıdkına anın nebâtât ü hacer
Gerçi vardır nâs beyninde hilâfetde hilâf
Şâh-ı kevneyn anı ta'yîn itdi oldur mu'teber
Cümle vârın tıyb-i hâtırla tasadduk itdi ol
Mihr ü mehden enver itdi sırrını ol pür-hüner
Yâr-ı sânîdir Resûl'e zeyn-i ashâb çün 'Ömer
Kuvvet-i İslâm içün beline bağladı kemer
Dîn-i bâkî içre şol denlü salâbet kıldı kim
Heybetinden zıllini görse ider Şeytân hazer
Bil anın islâmı ile zâhir oldu işbu dîn
Hem kamu a'dâsına buldu hilâfetde zafer
Yâr-ı sâlis ol nübüvvet şâhına 'Osmân durur
Mesken oldu mescid ü mihrâb ana şâm u seher
Her kişiye cennet içre lâzım elbette refîk
Didi 'Osmân'ı bana cennetde Hakk yoldaş ider
'Âlim ü câhil hayâyı dir mine'l-îmândır
Andan ahz itdi hayâyı ehl-i ihsân her ne var
Yâr-ı râbi' ibn-i 'amm oldur 'Aliyye'l-Mürtezâ
Zâhir ü bâtında ekmel şîr-i Hakk ol nâm-ver
Didi vasfında anın pes 'âlimü'l-esrâr olan
Ben medîne olmuşam 'ilme 'Ali'dir ana der
Gazvesinde hâcib oldu kıldı da'vet ol Resûl
Hâzır oldu ol zamân ki sem'ine irdi haber
Nûr-ı 'ayn-ı ehl-i sünnet verd-i bâğ-ı fahr-i dîn
Gelmedi dünyâ içün kalblerine zerre keder
Birisi İmâm Hasen'dir birisi İmâm Huseyn
Kıldılar Hakk'ın rızâsına fedâ cân ile ser
Mesken oldu bunlara Firdevs hâdim hûr-ı 'ıyn
Hamza vü 'Abbâs bâkî kim vâr ise min 'aşer
Cümleten evlâd u ashâbı ne varsa tâbi'în
Mazhar olup lutfuna kıldın 'inâyetle nazar
Hürmeti'yçün anların fazlınla sen yâ ze'l-'atâ
Yüzleri suyuna hıfz it bizi ez-râh-ı hatar
Ey Fenâyî sâlik ol zevk it o şânın rütbetin
İre îmânın 'ayâna kuru taklîdi gider
Ehl-i Cennet Fenâyî Mehmed Efendi
Kaddesallahu Sırrahu'l-Âlî