Kad Tecallâ fî'l-Merâyâ Ol Cemâl-i Bî-misâl
10 Ağustos 2022 tarihinde yayınlanmıştır.
NUTK-İ ŞERÎF
"Kad tecallâ fî'l-marâyâ" ol cemâl-i bî-misâl
Pes zuhûra geldi 'âlem ez mücellâ-yı cemâl
Çün ki mir'ât oldu 'âlem Hakk cemâlin görmeğe
Pes bu 'âlemde tecellî buldular ehl-i kemâl
Her neye kim bakdılarsa Dost cemâlin gördüler
Zîrâ dolu Hakk cemâli oldu 'âlem mâlâmâl
Cümle 'âlem 'aksidir ol hûb-cemâlin ey cemîl
Hem dahi bu küfr ü fâhiş cism ü cân u hadd u hâl
Çün vücûdu oldu Hakk'ın kâinâtun varlığı
Pes dü 'âlem cân-ı Hakk'dır dü cihân ansız hayâl
Cümle 'âlemdir mezâhir sen hod cümle mazharı
Sende iste tâ bulasın kalmaya hîç kıyl ü kâl
Mecma'u'l-bahreyn oldun hem Hudâ'nın ma'şûku
Pes senindir cümle 'âlem hem dahi Dost'a visâl
Şems-i neyyir çün önünde tâli' olur seninçün
Anı koyup tâlib oldun kevkebe her mâh u sâl
Âsitânında hazîne çün ki medfûn ola sen
Müflis olup ne revâdır idesin her dem suâl
Çün senin adın-durur hem cümle deryâ menbâ'ı
Susuz olup ne gezersin vâdî vü sahrâ cibâl
Ey dirîğâ hubb-i dünyâ kalbini itdi harâb
Sen anın ağusun içdin sanuban mâ-i zülâl
Her hevâ-yı nefse uydun kendini hor eyledin
Ehl-i hevâ Hakk katında zîrâ oldular zelâl
Çün hevâ-yı nefsi mahbûb idesin ma'bûd olar
Hâviyede İblis ile kalasın zî-zişt-mâl
Ger hevâyı terk idersen ma'bûdun tîz bulasın
Hem anınla bâkî kalup olasın sen lâ-yezâl
Sen mürîd-i Hakk isen nefsin murâdın ko ki tâ
Cân murâdına irüben görmeyesin hîç melâl
Mağrûr olup mağbûn olma nefsine mekkâredir
Cümle işi hep hîledir mekr ü küfr ü hem dalâl
A Şems gönlün mâsivâdan tarh idegör Dost içün
Tâ ki kuds-i gülzâr içre bulasın Hakk'dan nevâl
Akşemseddîn Velî
Kaddesallahu Sırrahu'l-Âlî