Kâinâtı Yaradan Hallâk u Deyyân El-Gıyâs
13 Şubat 2023 tarihinde yayınlanmıştır.
.jpg)
MÜNÂCÂT
Kâinâtı yaradan Hallâk u Deyyân el-gıyâs
Eylegil bu derdime yâ Rabbi dermân el-gıyâs
Tâkatim yok hasretin acısına sabr itmeğe
Eylerem subh u mesâ âh ile efgân el-gıyâs
Çeşmime hâbı harâm itdi visalin arzûsu
Yakdı kül itdi beni pes nâr-ı hicrân el-gıyâs
Bî-karâr oldum duyaldan 'aşkın esrârını ben
Bir dem eğlenmez dil ü cânım perîşân el-gıyâs
'Andelîbem ağlarım 'aşkınla vakt-i subha dek
Her gice iki gözümden dökülür kan el-gıyâs
Dost beni vaslın hevâsı kıldı bî-râhat nidem
Kalmadı bu dilde tâkat sabra bir ân el-gıyâs
'Aşkına gönlüm giriftâr oldı ârâm eylemez
Eyledi çün başıma dünyâyı zindân el-gıyâs
Arzular cânım visâlin şerbetini teşnedir
Bir kadeh bahr-ı keremden eyle ihsân el-gıyâs
İtme Kuddûsî fakîri bâb-ı lutfundan cüdâ
Yandı cismi firkatinle oldu biryân el-gıyâs
Ahmed Kuddûsî
Kuddise Sırruh