Kâinâtın Revnakı
9 Temmuz 2019 tarihinde yayınlanmıştır.
KÂİNÂTIN REVNAKI
Şehr-i a'zam kim binâsı gerçi mâ u tıyndedir
Ya anın üstündedür cennet yâhud altındadır
Bu haber kim söylenir hem zâhir ü bâtındadır
Revnakı bu kâinâtın şehr-i Konstantin'dedir
Ger sala Sultân Muhammed Zülfikâr-ı Hayder'i
Misl-i Hayber'dir küşâd ede bu yedi kişveri
Der melekler nutka geldikçe felekler dilberi
Revnakı bu kâinâtın şehr-i Konstantin'dedir
Misl-i dünyâdır anın içindeki câmileri
Zeyn olur hem cum'a gün huffâz ile mahfilleri
Gûşe ber gûşe pür olmuşdur cihân hâmilleri
Revnakı bu kâinâtın şehr-i Konstantin'dedir
İki 'âlem görmeği fikr eder isen cân ile
Var Galata şehrine deryâyı geç seyrân ile
Bâde ver de ömrü nûş et bâde-i hûban ile
Revnakı bu kâ’inâtun şehr-i Konstantin'dedir
Şûle saldıkça zemîn üstüne mâh-ı encümen
Nerkis-i ra'nâ biter hâk üzre her gûşe çemen
Der zebân-i cân ile sorsan bu güftârı çü men
Revnakı bu kâinâtın şehr-i Konstantin'dedir
Feth edüp Sultân Muhammed anda çün câ eyledi
Kâr-i âlîler yapup firdevs-i a'lâ eyledi
Değmemiş ey Aynî pür gılman ü havrâ eyledi
Revnakı bu kâinâtın şehr-i Konstantin'dedir
Karamanlı Aynî