Kanâat Kenz-i Hafîdir Birâder
5 Nisan 2022 tarihinde yayınlanmıştır.
NUTK-İ ŞERÎF
Kanâ'at kenz-i hafîdir birâder
Nice anlar bu remzi değme bir er
Kanâ'at sâhibini gâlib eyler
Ana bay u gedâyı tâlib eyler
Kanâ'at "kâf"dır "kâf" tevekkül
Anın "nûn"u nevâl-i hazret-i kül
Delâlet ider "elif"i ülfete pes
Cidâli ko çek elden el sesi kes
Anın "ayn"ı Alî'lik rütbesidir
Şeh-i merdân velîlik rütbesidir
Dilâ "tâ"sı delâlet terke eyler
Sivâyı terk gör kim sana n'eyler
Seni Yâr ile eyler âşinâ ol
İder ma'nâ gözünü rûşenâ ol
Dil enbânını memlû şevk eyler
Anı seyr itdürüp hem anı söyler
Habîbî bulayım dirsen bu zevki
"Tevekkelnâ 'alallah" remzin oku
Habîbî Ahmed Efendi
Kuddise Sırruh