Katresin Bahrden Ammâ Cemed Olmuş Mâsın
22 Nisan 2020 tarihinde yayınlanmıştır.
NUTK-İ ŞERÎF
Katresin bahrden ammâ cemed olmuş mâsın
Benliğin korsan eğer katre değil deryâsın
'Aşk deryâsına sal kendini havf etme sakın
Geç hevâdan ki yem-i 'aşka habâb-âsâsın
Bahr ile bahrsın emvâc ile mahkûm-ı hevâ
'Aşk ile 'ârif-i Hakk 'ilm ile Mevlânâ'sın
Tarabın 'aşk gamıdır ta'abın nefs ü hevâ
'Aşkdır mûnis-i cân gayr ile ber-gavgâsın
Gâh dil gâh zebân gâh 'ayân gâh beyân
Gâhî âyîne gehî tûtî-i şekker-hâsın
Hod-bîn oldunsa dolar hâne-i dil ceng ü cedel
Bî-hod oldunsa kamu halk ile hem-tenhâsın
Mahv edüb varlığını 'aşk ile var ol Hakkı
'Aşksız pâdişah olsan dahi sen lâlâsın
İbrâhim Hakkı Erzurûmî
Kaddesallahu Sırrahu'l-Âlî