Kemâlpaşazâde Hazretlerinin Vasiyetnâmesi

Müftî's-sekaleyn Kemâlpaşazâde Hazretlerinin ne büyük bir âlim ve ne şöhretli bir devlet adamı olduğu düşünülürse, bu vasiyetnâmenin ne büyük bir ibret vesîkası ve ne büyük bir ders levhası olduğu anlaşılır. İbret alınsın ve tefekküre vesîle olsun diye bu vasiyeti harfi harfine buraya kaydediyorum.

Bismillâhirrahmânirrahîm.

Elhamdülillâhi rabbi’l-'alemîn, ve's-salâtu ve’s-selâmu 'alâ seyyidinâ Muhammedin ve âlihî ve sahbihi ecma'în. 

Hâzâ mâ evsâ ve hüve yeşhedü en lâ ilâhe illâllâh ve enne Muhammeden 'abduhû ve resûlüh ve enne's-sâ'ate âtiyetun lâ raybe fîhâ ve ennallâhe yeb'asu men fi'l-kubûr.

Ba'dehû, vasiyyet iderim ki, muhtezâr olduğumda vech-i mesnûn üzre kıbleye teveccüh itdireler. Bir kimse yanımda teenni ile Kur`an okuya ve kelime-i şehâdeti yanımda tekrâr ideler. Rûhum kabz olıcak, on dört kimse tesbîh çevirüp yetmiş bin kerre lâilâheillallah deyüp sevâbın bana bağışlayalar. Ol kimselere bin akçe tasadduk ideler. Ve dahi sulehâdan bir hiç meyyit yumadık kimse benim meyyitim yuya, dahi yunurken su salâsın itmeyeler. Ve her camide salâ verdirmeyeler. Sultan Muhammed Camiinde salâ vermek hemân kifayet ider. Ve dahi yunurken ve götürürken cehr ile zikretmeyeler. Ve bilcümle şöhret itmeyüp, vech-i mesnûn olmayanı terk ideler, dervîşâne götüreler. Kabrim, makâbir-i müslimînde, yol üzerinde bir mürtefi'ce yerde ideler, üzerin yüksek yapmayalar, alâmet içün yonulmadık taşlar dikeler. Ve defnolunduğumda üzerimde cüz okumayalar zîrâ tahfîf-i Kur`an olur. Ve kurbân itmeyeler, fukarâya akçe üleşdireler. Ve sulehâdan bazı kimesnelere bir mikdar akçe vireler, anlar varup halvetlerinde hatm-i Kur`ân ideler. Ve yedi güne dek rûhum içün ta'am pişireler. Ve yedi gün kabrim bekleyüp duâ ve tesbîh ideler, bu cümleye on bin akçe harc ideler. Ve hac içün beş bin akçe vasıyyet itdim, bir kimseye verüp haccetdireler. Vasıyyetim kabûl idüp tenfîz ideler. Temmet.