Kerâmet Tarîkat Ehlinin Hicâbıdır
15 Ağustos 2020 tarihinde yayınlanmıştır.
NUTK-İ ŞERÎF
Bizim'çün çün ki var keşf ü kerâmât
Kadem himmet edüp olmak murâdât
İşitdim nice ehlullah derler
Hicâb olur tarîk ehline bunlar
Hicâb olan nice keşf olabilsin
Tedârik bizde ana göre kılsın
Suâl etdin hicâb-ı sâlikîni
Cevâbın vereyim ben dinle anı
Anınçün sâlike keşf oldu perde
Devâ olmaz bilirsin ehl-i derde
Keşîşler etseler bâtıl 'ibâdet
Bulur anlar dahi keşf kerâmet
Hicâb olur kadem çün dedi vâsıl
Olurmuş cin ile şeytâna hâsıl
Dilerse anı vakt içre cinnîler
Varırlar mağrib ü maşrıka anlar
Hicâb olur kerâmet dedi pîrler
Kerâmet var ki istidrâc derler
Bulara hakk u bâtıl müşterekdir
İşit keşf-i kadem nice gerekdir
Budur ol ma'nevî keşf anlar isen
Bilirsin kendi 'aybını er isen
Derûnun 'aybın anla eyle ıslâh
Budur fehm eyle keşf-i billah
Tutalım âhirin hâlin bilirsin
Anı bilmekde ne hâsıl kılarsın
Derûnunda alâik kat' edersen
Gönülden mâsivâyı hep gidersen
Kerâmet budur idrâk eyle imdi
Derûnun merd isen pâk eyle imdi
Tutalım dağı dururken yürütdün
Kerâmet gösterüp taşı eritdin
Yolundan alıkor hiç nef'i yokdur
Sözüme i'tikâd et nutk-i hakdır
Muhammed'e risâlet hatm olundu
Kerâmât mu'cizât anda bulundu
Kadem taşra basarsan mülk-i tenden
Sefer etmek görünür sana tenden
Varup cân mülküne erişesin sen
Melâik birle hoş görüşesin sen
Tutalım zâhiren kuş gibi uçdun
İbâdet etmeğe Ka`be'ye göçdün
Büyükdür kalbini Ka`be kılasın
Gece gündüz her an anda olasın
Bular tevhîd ile hâsıl olur hep
Yürü cehr ile zikret yummagil leb
Eyüdür zikr-i cehr etmek kişiye
Gerek erkek vü gerekse dişiye
Ederler bazılar tevhîdi ihfâ
Hatâ yokdur meğer anlarda kat'â
Kaçan kim müntehîlerden olursun
O vaktin zikri kalbinde kılasın
Suâl edüp sana derse bir âdem
Tezekkür cehrî mi ahfâ mı a'lem
Cevâb verüp diyesin ana sen de
'Adüvvüyle mukâbil olduğunda
Yarağı ana süst urmak mı yeğdir
Veyâ berk urup öldürmek mi yeğdir
Kaçan kim zikri cehr ile kılasın
Bu zâhir cismini sâlih kılasın
Eğer sen eyleyeydin zikr-i zâhir
Beden ıslâh olurdu elbet âhir
Erişir kalbe andan sonra tevhîd
Mübeddel olıser tahkîke taklîd
Seyyid Seyfullah
Kuddise Sırruh