Keşf Edüp Bîhûde Hattı Yaz Ledünnîden Rıkâ'
28 Kasım 2020 tarihinde yayınlanmıştır.
NUTK-İ ŞERÎF
Keşf edüp bîhûde hattı yaz ledünnîden rıkâ'
Gel bugün efsâne sözden eyle sâlik el-vedâ'
Çün mücerred olmasa sâlim denilmez anladın
Bu 'alâyıkdan be-küllî eyle sôfî inhilâ'
Çünki mu'telsin tedârik eyle kalb ile ana
Tâ ere gönlün gözüne işbu revzenden şu'â
Mâzî vü müstakbeli terk eyle hâli gözle sen
Geç geçenden dahi müstakbelden eyle inkıtâ'
Levh-i dilden umma sen 'ilm-i ledünnî Şemsiyâ
Hızr-ı rûhun sırrına bulmak dilersen ıttılâ'
Nice bir havf-ı zevâyilde edersin güft ü gû
Deyr-i kün ki hâsılı "el-yevme tünsâ" oldu sâ'
Çün derûnunda musavver olmağa ma'nâ-yı vây
İşbu yüzden lafz-ı vây ile beğim gitmez kınâ'
Mübtelâ eyle anın ism-i nefîsin dâimâ
Tâ ki illallâh haber ola bulasın irtifâ'
Sen kaçan sarf olasın Hakk yoluna çün 'illetin
Hubb-ı dünyâ vü riyâset sende etdi ictimâ'
'Âlemin terkîbini mahvıyla i'râb eylegil
Ref' ü hazfın 'âmilin bir anlayıp etme nizâ'
Ger tamâm olmak dilersen ism ile ol müktefî
Nâkıs olur etmeyen özge haberden inkıtâ'
Gir hüviyyet 'âlemine kıl 'alallâh seyrini
Yeftehullahu bihî ebvâbe esrâri'l-kılâ'
Nice hem sohbet olur yâ hû denilir rûz u şeb
Şol gürûhîliği verdi ya fesâk u ya likâ'
Eyle sôfî mümkinâtı zât-ı vâcibden temiz
Atmagıl bîhûde sengi tâ ki sınmaya fukâ'
Çün bu üslûb üzre sâlik asl-ı hâli duymadın
Sâbit ol nehc-i tarîkatda onat kıl ittibâ'
Bâb-ı tahzîzi onat feth eyle "iyyâke'l-esed"
Ya'ni nefsinden hazer eyle budur yolda bisâ'
Girmegil bâb-ı tenâzu'dan ki yokdur assısı
Kim hakîkat şehrine lâyık değildir her metâ'
Nefy ü istisnâda bahs etmek dilersen Şemsiyâ
Tallâhi vallâhi ders eyle bulursun ıttılâ'
Şemseddîn Sıvâsî
Kuddise Sırruh