Keşfoldu Bana Bu Gece Ma’nâ-yı Hakikat
14 Şubat 2022 tarihinde yayınlanmıştır.
NUTK-İ ŞERÎF
Keşfoldu bana bu gece mâ’nâ-yı hakikat
Yazıldı gönül levhine imlâ-yı hakîkat
Mevc eyleyerek hâb-ı tegafülden uyandım
Cûş eyledi deryâ gibi deryâ-yı hakîkat
Çün Âdem'e bildirdi Huda 'alleme'l- esmâ
Elbette o âdemdedir esmâ-yı hakîkat
Var söyle ki sen sôfî-i nâ-kâma bu hâli
Ol eylemesin yok yere da'vâ-yı hakîkat
Her bir kese kadrince füyûzat et efendim
Taksîm eder ol "nahnü kasemnâ"-yı hakîkat
Sabr eyle ki sabrın sonu miftâh-ı ferecdir
Böyle buyurur hâce-i dânâ-yı hakîkat
Bu 'âlem-i vahdetde senin gördüğün Emrah
Kim gördü 'aceb böylece rüyâ-yı hakîkat
Erzurumlu Emrah
Kuddise Sırruh