Kesildi Ravza-i Dilden Hemân Su
18 Mart 2023 tarihinde yayınlanmıştır.
.jpg)
NUTK-İ ŞERÎF
Kesildi ravza-i dilden hemân su
Gel ey sâkî kerem kıl el-amân su
O sudan kim bu sular görmez anı
Verir kalbe hayât-ı câvidân su
'Aceb menba'dır ol kim cünbüşünden
Dolar her dem nice bin nehr-i cân su
Hemân bir lokma nân için gedâ-veş
Yüzünden dökme var ey mihmân su
Cihân başdan başa bir lokmadır çün
Ona hırs eyledin oldu nihân su
Bu hırsı terk ederse hût-ı cânın
Varır bahrinde nûş eyler her ân su
Hayat ol dem bulur bu ravza-i dil
Ki ol yemden dolar bağ-ı cinân su
Revân u cânın ol dem şâd olur kim
O deryâdan dola cânın revân su
Gönülden bâğ-ı 'aşk ey Hakkı ancak
O sâkîden bulur bu gülsitân su
Erzurumlu İbrâhim Hakkı
Kuddise Sırruh