MuzafferOzak.com (Türkçe)

NUTK-İ ŞERÎF

Kesret-i esmâ sıfatdan zâtın i'lândır garaz

Zât-ı Ahmed'den zuhûr-ı Hakk'ı ityândır garaz

'Akl u nûr rûh u kalem "ahbebtü en-u'ref"dedir

Halk-ı eşyâdan vücûd-ı Hakk'ı seyrândır garaz

"Alleme'l-esmâ"yı bil âdemdeki esrârdır

Harf u savt u lafzdan ma'nâ-yı Kur`ân'dır garaz

Katreler yemden çıkar enhâr olup durmaz akar

Cenk eder her seng ile deryâ-yı 'ummândır garaz

Devr-i eflâk ü 'anâsır tavr-ı eşkâl ü suver

Cümle mevcûdun vücûdu Hakk'a burhândır garaz

Gâfil olma her belâ gafletdedir olma melûl

'Ârif ol kim her belâdan gaye ihsândır garaz

Tâ ezelden nûr-ı vâhiddir Muhammed'le Alî

Âyet-i "sümme-denâ"dan Şâh-ı Merdân'dır garaz

"Küntü kenz" 'ârifleri ol kenzden bir nûrdur

Devr eder her 'âlemi isbât-ı Yezdân'dır garaz

Nefsini idrâk eden kâim-bi-nefsillâh olur

Bildiler insâniyetden 'ilm ü 'irfândır garaz

Ser-be-ser eşyâ 'avâlim bî-karâr bir 'aşk ile

Her biri durmaz döner ta'zîm-i insândır garaz

Cism ü a'zâ vü his terkîbi insânlıksa da

Vech-i insândan şuhûd-i vech-i Rahmân'dır garaz

Her nefesde sende zâhir sende bâtındır Hudâ

İsm ü resm ü nev'den tesbîh-i Sübhân'dır garaz

Mahzen-i râz-ı Hudâ sensin mahall-i hayr u şer

Sendedir sırr-ı kader ol sırr-ı iz'ândır garaz

Bil salât-ı dâimûn sırrın Kemâlî 'aşk ile

Dâimâ 'âşık huzûr-ı Hakk'da dîvândır garaz

Osman Kemâlî Efendi

Kuddise Sırruh

Kesret-i Esmâ Sıfatdan Zâtın İlândır Garaz