Kıble-i Ehl-i Safâ Oldu Cenâb-ı Mustafâ
12 Ocak 2016 tarihinde yayınlanmıştır.
Kıble-i ehl-i safâ oldu cenâb-ı Mustafâ
Kâbe-i kûy-i vefâ oldu cenâb-ı Mustafâ
"Leyletü'l-isrâ" haremden eyleyüp geşt ü güzâr
Zulmet-efrûz-i dücâ oldu cenâb-ı Mustafâ
'Azm-i dergâh-ı İlâh itdi burâk-ı himmeti
Hemreh-i peyk-i hüdâ oldu cenâb-ı Mustafâ
Virdi mişkât-ı risâlet "mescid-i aksâ"ya fer
Muktedâ-yı enbiyâ oldu cenâb-ı Mustafâ
Rıf'at ile hâkden eflâke mi'râc eyledi
Pertev-endâz-ı semâ oldu cenâb-ı Mustafâ
Sidre oldu kâmet-i tûbâsının âvâresi
Server-i her-müntehâ oldu cenâb-ı Mustafâ
Lâ-mekân âlemlerin gül-geşt edüp Refref-nişîn
Sadr-ı bedr-i ıstafâ oldu cenâb-ı Mustafâ
Eyledi halvet-serây-ı "lî-ma'allah"a nüzûl
Şem'-i cem'-i Kibriyâ oldu cenâb-ı Mustafâ
"Kâbe kavseyn"e nişân oldu kemân ebrûları
Menzil-i kurba serâ oldu cenâb-ı Mustafâ
Eyledi çeşmin mücellâ kühl-i "mâ zâga'l-basar"
"Len terânî"den rehâ oldu cenâb-ı Mustafâ
Kasr-ı "mâ evhâ"da gördü zât-ı vahdet güllerin
Bülbül-i bâğ-ı likâ oldu cenâb-ı Mustafâ
Vech-i Hak âyine-i vechinde oldu rû-nümâ
Mazhar-ı zât-ı Hudâ oldu cenâb-ı Mustafâ
Zâtdan semt-i sıfâta eyledi atf-ı 'ınân
Arş u ferşe cân-fezâ oldu cenâb-ı Mustafâ
Âlemi pür eyledi gülbang-i tabl-ı pencgâh
Mülk-i dîne pîşvâ oldu cenâb-ı Mustafâ
Oldu Bû-Bekr u Ömer Osmân u Hayder çâr-yâr
Âl u ashâba 'atâ oldu cenâb-ı Mustafâ
Hâdi-i râh-ı rızâ oldu cenâb-ı Mustafâ
Mustafâ'ya rehnümâ oldu cenâb-ı Mustafâ
Âsiyân-ı ümmete dârü'l emândır dergehi
Ehl-i cürme mültecâ oldu cenâb-ı Mustafâ
Zât-ı pâki evliyânın melce ü me'vâsıdır
Nûr-i çeşm-i asfiyâ oldu cenâb-ı Mustafâ
Neccarzâde Rızâ Efendi
Kaddesallahu Sırrahu'l-Âlî
NAĞME-İ AŞK
NAĞME-İ AŞK