Kıldı İnsâniyyeti İnsânlığı Âbâd Dîn
6 Ekim 2023 tarihinde yayınlanmıştır.
NUTK-İ ŞERÎF
Kıldı insâniyyeti insânlığı âbâd dîn
Ayırup hayvâniyetden eyledi âzâd dîn
Hulk-i pâk-i Ahmed-i Muhtâr ile tezyîn edüp
Zât-ı pâk-i vahdete hem eyledi irşâd dîn
Fark içün insânı hayvândan kerâmât-ı kelâm
Merhamet re'fet hayâ iffet rızâ îcâd dîn
Âdem'e ta'lîm-i esmâ 'ârife esrâr-ı Hakk
Kim bilirdi hayr u şerri etmese imdâd dîn
Târih-i 'âlem kadar yokdur mu'allim 'âkile
Bak ne yapdı dîni tahkîr eyleyen Şeddâd'ı dîn
Dîn ile dünyâyı tezyîn etmeyen her milletin
Yapdığı türlü hatâlardan eder feryâd dîn
Dîne bağlı bir avuç Türk'den neler çıkdı neler
Etdi dînsiz bir nice milletleri berbâd dîn
Dîn deyüp geçme eğer dîn olmasa olmazdı hak
Hakk'dır insânoğluna vermiş sahîh evlâd dîn
Münkir-i dîn kendini inkâr eder duymaz ezân
İbtidâ fevz ü felâha çağırup nevzâd dîn
Dîn nedir dünyâ nedir fark etmeyen gâfillere
'Âlim olsun câhil olsun oldular ilhâd dîn
Dîn ile dünyâyı düşman gösterir ehl-i dalâl
Etdiler dînsizliği başdan başa isnâd-ı dîn
Etmesin da'vâ-yı hürriyet esîr-i nefs olan
Gâfilin kalbinde aslâ işlemez mirsâd-ı dîn
İster ol mes'ûd-i 'âlem ister ol menfûr-ı Hakk
Nev'-i insâna sa'âdetler verir is'âd-ı dîn
Cins-i insân olsa da Şeytân'dan edalldir o kim
Gösterüp dindâr kendin etdiler ifsâd-ı dîn
Dîn Muhammed dînidir Kur`ân Kitâbullâh'dır
Her ne var ahkâm-ı Hakk'ı bildirir üstâd-ı dîn
Hem nebîler hem velîler dîn-i Hakk me'mûrudur
Eyle zikrullâhı dâim ol durur evrâd-ı dîn
Hind ü Fâris Türk Arab Kürd Arnavud her ayrılık
Bir inanca bağlayıp birleşdirir efrâd-ı dîn
İki âlemde sa'âdet isteyen olsun emîn
Ey Kemâlî her kemâle yetdiler zühhâd-ı dîn
Osman Kemâlî Efendi
Kuddise Sırruh