Kılmadım Ben Ömrüm İçre Hakk'a Lâyık Bir Amel
16 Eylül 2021 tarihinde yayınlanmıştır.
NUTK-İ ŞERÎF
Kılmadım ben 'ömrüm içre Hakk'a lâyık bir 'amel
Gece gündüz vird i zikrim fikret-i tûl-i emel
Halvetimde müştehâ-yi nefsi fikr etmek işim
Celvetimde hod mesâvî gıybet ü mekr ü hiyel
Fikr-i dünyâ eylesem gâyet kavîdir bu gönül
Tâ'at etmek kasd kılsam yok durur benden kehel
Ger salât ü ger sıyâm etsem riyâ vü süm'adır
Kavl ü fi'lim her ne kim var pür-garazdur pür 'ilel
Nefsime tâbi' olup ol resme 'ısyân etmişem
Rûz-i mahşer gelmeye a'mâlde benden ekal
Nakd-i 'ömrü ma'sıyet yolunda hep kıldım telef
Olmuşamdır her 'azâb u şiddete yâ Rab mahal
Arzû-yı nefsime şol denlü sa'y ettdim ki uş
Geldi 'ömrüm âhır oldu elde yokdur mâ-hasal
İttisâf-ı ma'sıyetle bulmuşam bir haddi kim
Bunca mahlûk içre yâ Rab yok durur bana mesel
'Adlin ile ger 'azâb etsen bana yevmü'l-cezâ
Ger göre hâlim firâr ede yanımdan hep milel
Kalmışam yâ Rab dalâlet içre hâdî ol bana
Her kime senden hidâyet erdi yok ana vecel
Ger zıyâ-i şems-i cûdun ermeye ben kalmışam
Zulmet-i 'ısyânda mânend-i üştür der-vahal
Olmazam nevmîd yâ Rab feyz u fazlından senin
Nefs-i bed-hûya me'âsî ger vere bî-had zelel
Halk-ı 'âlem fâcir olsa yâ mutî' olsa kamu
Zât-i pâkine senin gelmez tezâyüd yâ halel
Her kişi ger hayr ü ger şer etse râci' nefsine
"Leyse li'l-insâni illâ mâ se'â" dedin ezel
Çün ki ta'mîm-i 'atâ edüp dedin "lâ-taknetû"
Âb-i rahmetden mukarrer bildi halk erer belel
Reşha-i rahmet 'usât-i mü'minîne bes durur
Zümre-i ma'fûdan olmakdır recâ-yı bî-bedel
Mücrim ü 'âsîlerin cürmün kamu 'afv eyleyüp
Cennet ü dîdâr versen sana kimse etmez cedel
Bahr-i rahmet katresi kurbunda cümle mahv olur
Bu me'âsînin ger ola her birisi bir cebel
Yâ ilâhî sen halâs et bu siyeh-rû bendeni
Mekr ü şeytân ü hevâ-yı nefsden kable'l-ecel
Lutf u fazlından Hudâyâ 'Ârif-i esrârına
Feth ola tâ sırr-ı 'âlem kalmaya gözde sebel
Ahmed Efendi
Kuddise Sırruh