Kim ki Cândan Teşnedir Cûş Eyler Âb-ı Ma'rifet

21 Ağustos 2020 tarihinde yayınlanmıştır.

NUTK-İ ŞERÎF

Kim ki cândan teşnedir cûş eyler âb-ı ma'rifet

Bezm-i hâssın ehli nûş eyler şarâb-ı ma'rifet

Şerh-i a'yân ü mezâhir metnidir Ümmü’l-Kitâb

Sadr-ı kâmilde muharrerdir kitâb-ı ma'rifet

Meşrık-ı lâhûtdan rahşân olunca pertevi

Mahv eder târ-ı hicâbı âfitâb-ı ma'rifet

Râhatü’l-ervâh olur 'uşşâk bezm-i hâssda

Nağme-sâz oldukça erbâb-ı rübâb-ı ma'rifet

İncizâb-ı kalb olur bezminde lâbüd merd ise

Hâzır ol andan edersin iktisâb-ı ma'rifet

Bezm-i sohbetden murâd oldur ki nûr işrâk ede

İn'ikâsıdır anın miftâh-ı bâb-ı ma'rifet

Kenz-i ma'nânın mutalsam kuflünü feth eyleyen

Ancak oldur mâlik-i nakd-i nisâb-ı ma'rifet

Vehm ü hüsn-i zann ü akl-ı felsefî mahdûddur

Hasra küncâyiş-pezîr olmaz hisâb-ı ma'rifet

Teşnelik sözden 'ibâret olmadıkça lâ-cerem

Seyl-veş rîzân olur âb-ı sehâb-ı ma'rifet

Pürsiş etme kimseden Azmî'den al işte cevâb

Kalb-i 'uşşâk-ı ilâhîdir meâb-ı ma'rifet

Kalbini âmâlden her kim ederse tasfiye

Sâlikân-ı râh-ı Hakk'dır feyziyâb-ı ma'rifet

Cezbedir tâlibleri maksûda îsâl eyleyen

İştibâh etme odur râh-ı savâb-ı ma'rifet

Azmî Dede

Kuddise Sırruh