Kimi Kullarına Mevlâ Atâsını Cezîl İtmiş
30 Ocak 2023 tarihinde yayınlanmıştır.
NUTK-İ ŞERÎF
Kimi kullarına Mevlâ 'atâsını cezîl itmiş
Kimini ibtilâ-yı fakr u zilletle zelîl itmiş
Kimine hazz-ı 'âcil virüben dünyâda itmiş bay
Kimine ecr-i lâ-yuhsâ virüp rızkın kalîl itmiş
Kiminin halka-i la'net takup boynuna itmiş tard
Kimine geydirüp hülle ridâsını halîl itmiş
Kiminin tab'ını câmid idüp hîç virmemiş 'aşkı
Kiminin doldurup 'aşk ile göynün bahr-ı Nîl itmiş
Kiminin hulkunu cûd u sehâ itmiş cihân içre
Kimine mâl-ı dünyâyı virüp nefsin bahîl itmiş
Kimine 'izzet ü rıf'at sa'âdet tâcı geydirmiş
Kimini halk-ı 'âlem içre menhus u rezîl itmiş
Kimine semt-i maksûda muvâfık rûzigâr virmiş
Kimin girdâba düşürmüş halâsın müstahîl itmiş
Kiminin diline zikrini virmiş göynüne fikrin
Kiminin mürg-i laklak-veş işini kâl u kıyl itmiş
Kimine hoş nazar kılup makâmın eylemiş 'âlî
Kimisini nazardan eyleyüp sâkıt sefîl itmiş
Kiminin şuglünü kılmış hemân hırs ıla cem'-i mâl
Kimi bâb-ı tevekkülde Hudâ'sını vekîl itmiş
Kiminin sevgisin koyup gönüllerde habîb itmiş
Kimisini halâik içre menfûr u sakîl itmiş
Kimin 'ârif kimin 'âbid kimin 'âşık kimin zâhid
Kimin Kuddûsî-tek âvâre cebbâr u celîl itmiş
Ahmed Kuddûsî
Kuddise Sırruh