Korkaram Âhir Günümde Hâlim Perişân Ola
25 Ağustos 2022 tarihinde yayınlanmıştır.
NUTK-İ ŞERÎF
Korkaram âhir günümde hâlim perişân ola
Tükene 'ömr-i 'azîzim hep işim yalân ola
Emr ede ol günde Allah al cân deyu Azrâil'e
Titreye cümle vücûdum tesbîhim amân ola
Birbiriyle cümle a'zâ edeler çün elvedâ'
Çekilip göğsüme cânım gözlerim giryân ola
Döküle gevher gözümden görmez ola kimseyi
Tutula ağzımda dilim bir müşkil zamân ola
Dilerim ol demde Allah lutfunu rehberim kıla
'Afv ede cümle kusûrum yoldaşım îmân ola
Çün koyalar kabr içine gele münker ile nekir
Soralar bizden suâli ola ki âsân ola
Ger hitâb ederse Allah çek cezânı cürmünü
Kimseler bilmeyip hâlim ol zamân zindân ola
Nefh-i sûr oldukda yerden deprene a'zâlarım
Toprağın silkerek kalkıp cümlemiz 'uryân ola
Gele "vemtâzû" hitâbı seçile mü'min kamu
Açıla sancâğ-ı Ahmed altına fermân ola
Kurula mîzân terâzi tartıla a'mâlimiz
Defterim ol gün dürülüp her işim 'ayân ola
Hükm ede ol günde Allah 'afv ile hem 'adl ile
Çekeriz fi'l-i cezâmız bir 'azîm divân ola
Kimisi düşe cahîme yüzü üzre sernigûn
Görüben türlü 'azâbı ciğeri büryân ola
Kala ol âteş içinde nice bin yıl zâr ile
Yiyesi zakkûm ta'âmı kimisi katrân ola
Kimisi gide cinâna lutf ile i'zâz ile
Hûriler karşı geleler hâdimi gılmân ola
Yiyüben ni'metlerini biri birinden elezz
İçüben sükkeri şerbet her biri sekrân ola
Hâmid ü 'ubbâd u zühhâd bunculayın zevk ile
Şükr-i ni'met 'âşıkâna rü'yet-i Rahmân ola
Ola her Cum'a gününde vuslat-ı zevk-i cemâl
Mest-i lâ-ya'kıl oluben bir 'aceb seyrân ola
Sûziyâ bunca kemâle erilmez noksân ile
Yüz sürüp dergâha yalvar ola kim ihsân ola
Ahmed Sûzî
Kuddise Sırruh