Kulak Tut Ey Birâder Sana Bir Sır Edem İlâm

3 Mayıs 2020 tarihinde yayınlanmıştır.

NUTK-İ ŞERÎF

Kulak tut ey birâder sana bir sır edem i'lâm

Ki fehm eyle muhakkak üç bölükdür nev'-i insân

Birisi ehl-i dünyâdır birisi âhiret hem

Birisi zümre-i 'uşşâk ki anlar ehl-i Yezdân

Harâmdır âhiret ehli olanlara bu dünyâ

Ve dünyâ ehline pes âhiret bil oldu harâm

Hudâ ehli olan merdâna bu iki harâmdır

Yürü var ehl-i Hakk olmağa sa'y et durma ey cân

Dahi cennet ikidir cennetü'l-hayvân birisi

Olur sâkinleri anın 'avâm-ı ehl-i îmân

Birisinin cennetü'r-rıdvân durur ismini anla

Anın sakinleri ancak havâss-ı ehl-i 'irfân

'Aceb n'oldu bana kim bilmezem hergiz edeb iz'ân

Liyâkat yok ise de hîç umaram cennetü'r-rıdvân

 Eder sâkin olan anda nazar Hakk'ın cemâline

Hemîn olur imiş dâim beher dem vâlih ü hayrân

Yemek içmek tena'um eylemek olmaz imiş anda

Anın sükkânı ederler telezzüz 'aşk ile her ân

Kokar imiş anlara cîfe gibi ni'met-i cennet

Harâm kılmış durur 'uşşâka anı Hazret-i Yezdân

Umar Kuddûsî-yi meczûb u câhil bilmeyüp haddin

Geçüp her mâsivâdan olmağı ma'şûkuna mihmân

Ahmed Kuddusi

Kuddise Sırruh