Kur`ân Edüp Tilâvet Tâhâ'yı Öldürürler
8 Eylül 2019 tarihinde yayınlanmıştır.
MERSİYE-İ KERBELÂ
Kur`ân edüp tilâvet Tâhâ'yı öldürürler
Katleyleyüp imâmı Yâsîn ederler ezber
Al kanlara boyandı dürdâne-i Peygamber
Bak ne sitemler oldu evlâd-ı "hel etâ"ya
Düşdü Hüseyn atından sahrâ-yı Kerbelâ'ya
Cibrîl git haber ver Sultân-ı Enbiyâ'ya
Ol şâha eyledikçe her dem hücûm-i leşker
Ok üstüne ok ururlar hançer üstüne hançer
Meydânda şehber açmış tâvûs-i 'arşa benzer
Hayf ol garîb-i kûy-i ferhunde pür-hümâya
Düşdü Hüseyn atından sahrâ-yı Kerbelâ'ya
Cibrîl git haber ver Sultân-ı Enbiyâ'ya
Bir hadde erdi zahmı şimşîr-i ter-nîze
Kim olmuş ol garîbin a'zâsı rîze rîze
Âgûş-i izzetinde bak beslenen azîze
Bir merhamet eden yok mahbûb-i Mürtezâ'ya
Düşdü Hüseyn atından sahrâ-yı Kerbelâ'ya
Cibrîl git haber ver Sultân-ı Enbiyâ'ya
Eyvâh eğer bu işten Zehrâ olursa âgâh
Bir na'ra ile sarsar hep kâinâtı billâh
Eyler cihânı kuds-i ma'rûz-i şu'le-i âh
Mazlûmenin bu âhı ateş saçar semâya
Düşdü Hüseyn atından sahrâ-yı Kerbelâ'ya
Cibrîl git haber ver Sultân-ı Enbiyâ'ya
Abran eyle yâ Muhammed ey pâdişâh-ı levlâk
Mânend-i zât-ı akdes sen dahi ağlar eflâk
Oğlun Hüseyn'e n'itti gör bu gürûh-i nâ-pâk
Nefrîn ola bu kavm-i bî şerm ü bî-hayâya
Düşdü Hüseyn atından sahrâ-yı Kerbelâ'ya
Cibrîl git haber ver Sultân-ı Enbiyâ'ya
Ey cedd-i serfirâz-ı nûreyn-i neyyireynin
Bir başka hâle girmiş dünyada nûr-i 'ayneynin
Döşü mübâreğinde gezdirdiğin Hüseyn'in
Başı kesildi geçdi ser-nîze-i cefâya
Düşdü Hüseyn atından sahrâ-yı Kerbelâ'ya
Cibrîl git haber ver Sultân-ı Enbiyâ'ya
Maktûl olan eğerçi mazlûm-ı 'itretindir
Leb teşne-i zülâl-i dîde-i hazretindir
Var kâtilin de seyret bu kendi ümmetindir
La'net bu nâkesân-ı bî-rahm-i bî-vefâya
Düşdü Hüseyn atından sahrâ-yı Kerbelâ'ya
Cibrîl git haber ver Sultân-ı Enbiyâ'ya
Söyler kelâm-ı hakkı bâtıl gürûh istemez
Gitdikleri tarîka ki bir Mecûsî gitmez
İslâm'a bu cefâyı kâfir de olsa etmez
Müslim denilmez aslâ bu kavm-i eşkıyâya
Düşdü Hüseyn atından sahrâ-yı Kerbelâ'ya
Cibrîl git haber ver Sultân-ı Enbiyâ'ya
Osman Hulûsî Efendi
Kuddise Sırruh