Kutb-ı Âlem Gavs-ı Ekrem Melce-i Ehl-i Yakîn
19 Kasım 2023 tarihinde yayınlanmıştır.
NUTK-İ ŞERÎF
Kutb-ı 'âlem gavs-ı ekrem melce-i ehl-i yakîn
Şeyh Muhammed bin Nasûh ol kıblegâh-ı vâsılîn
Nâmı âlemde Nasûhî olmağa bâ'is bu kim
Vâlidi ismiyle ma'rûf idi ol merd-i güzîn
'Ârif-i 'ilm-i ledünnî vâsıl-ı esrâr-ı Hû
Lâ-cerem mekşûf idi ana 'ulûm-i mürselîn
Nûr-ı tevhîd ile etmişdi derûnun tasfiye
'Aşk-ı Mevlâ ile olmuşdu cihânda kâmbîn
İftihârıydı Tarîk-i Halvetî'nin ol 'azîz
Ehl-i vecdin serveriydi imâmü'l-'ârifîn
Nice sâl irşâd ile me'lûf olup 'âlemde ol
Menzil-i maksûda irdi sâyesinde sâlikîn
Zâhir ü bâtın nice keşf ü kerâmâtı anın
Gam yeme dahl eylese ana gürûh-ı münkirîn
Kadrini ancak zevi'l-kadra suâl et kâmilin
Bilir erbâbı ne denlü olsa cevher nâzenîn
Rûh idi cism içre gûyâ Üsküdar'da ol kerîm
Kâleb-i bî-rûh kaldı şehrimiz etsin enîn
Terk edüp kesret libâsın ol vücûd-ı muhterem
Eyledi vahdet makâmın kendüye huld-i berîn
Cânib-i "firrû ilallah"a 'azîmet eyleyüp
Davete etdi icâbet koydu ahbâbın hazîn
Evsat-ı mâh-ı sıyâmda eyledi 'azm-i bekâ
Vuslatı 'ıyd ile ikrâm ide Rabbü'l-'âlemîn
Gark-ı envâr-ı tecelliyât edüp ânen fe ân
Hâbgâhını metâf-ı kudisyân et yâ Mu'în
Firkatiyle sûze gelsinler felekler dem-be-dem
Âh u zâr u nâleler kılsın gürûh-ı sâlihîn
"Azm-ı bâkî eyledi hay rahmetullahi 'aleyh"
Oldu sâl-i rıhleti ol kâmilin bil ey emîn
Sem'-i cânına irişdikçe hitâb-ı "ircı'î"
"Rûh-i pâkin Hû deyüp teslîm-i Hû kıldı hemîn"
Cem' olup evlâd u etbâ'ı mübârek kabrine
Dedi târih "hâdî-i zühhâd şeyhü'l-kâmilîn"
Medfen-i pâkin ziyâret eyleyen 'âşıkları
Dediler târihi "hay mâte kutbü'l-'âşıkîn"
Çıkdı üçler iki defa iki târih dediler
Şeyh-i Ekber kabrine el-fâtiha yâ müslimîn
Senâî