Lâ-mekân Ehliyiz Âlemde Mekân İstemeyiz
7 Aralık 2023 tarihinde yayınlanmıştır.
NUTK-İ ŞERÎF
Lâ-mekân ehliyiz 'âlemde mekân istemeyiz
Bî-nişânlıkda nişân olsa da şân istemeyiz
İrdik ol 'âleme k'anda ne sabâh u ne mesâ
İrdik ol devre ki devrinde zamân istemeyiz
Bî-ser ü pâ ideriz tayy-ı menâzil ile seyr
Kat'-ı râh eylemeğe pây-ı revân istemeyiz
Kenz-i mahfîyi nihân-hâne-i dilde bulalı
Biz olup râz-ı nihân râz-ı nihân istemeyiz
Ol hıyâbân-ı mugaylân-ı gamız himmetimiz
Sayd-ı matlûba yeter şîr-i jiyân istemeyiz
Biz o bahrız ki felekler bize emvâc-ı habâb
Ebedî sâhil-i sedd-i cereyân istemeyiz
Hâk-i ten arz-ı mukaddes u gönül beyt-i Hudâ
Eyledik Hakk'da fenâ rûh-ı revân istemeyiz
Bî-zebân nakş ideriz levh-i dile 'ilm-i ledünn
Elde bir kilk-i hoş-âyende zebân istemeyiz
Ser-fürû eyledi çün kavs-i kazâ kaddimize
Hasm-ı nefse yetişir tîr ü kemân istemeyiz
Bülbül-i nağme-serâyız o gülistânda ki Şems
Mebhas-i gonce-i vahdetde dehân istemeyiz
Osman Şems Efendi
Kuddise Sırruh