Leyse Fi'd-Dâri Gayruhû Deyyâr
14 Şubat 2023 tarihinde yayınlanmıştır.
NUTK-İ ŞERÎF
I
Ey tılısm-ı hazîne-i envâr
V'ey muhît-i cevâhir-i esrâr
Ey zemîn ü zamâne maksûdu
V'ey güzîn-i netîce-i her-kâr
Sen seni bil ki mazhar-ı küllsün
Sensin âyîne-i ruh-ı dildâr
Eyle halvet-serây-ı hâssa duhûl
Gezme bîgâneler gibi zînhâr
Varlığın sedd-i râh-ı ma'nîdir
Vârı yok eyle kim ola yok vâr
İ'tibâr-ı vücûda verme vücûd
Koma mir'ât-ı dilde jeng ü gubâr
Çeşm-i hak-bîn-i pür-safâ kesb et
Nice bir gözde perde-i pindâr
Ayn-ı vahdetle kıl cihâna nazar
Bir görünsün gözüne her ne ki vâr
Bir hakîkatdir ey Sabûhi kamu
'Aks-i mir'ât-ı dîde vü dîdâr
'Aşk u ma'şûk u 'âşık oldu yâr
Leyse fi'd-dâri gayruhû deyyâr
II
'Aşk çün perdeden 'ayân oldu
Mâsivâ-yı Hudâ nihân oldu
Çekdi 'uşşâkı mülk-i ıtlâka
'Aşk minhâc-ı 'âşıkân oldu
Dîde-i 'âşıkın ziyâsı 'aşk
Hüsn-i dilberde 'aşk ân oldu
Tâ bilindi hakîkat-i eşyâ
Her varak defter-i beyân oldu
Zerre mihr-i cihân-fürûz oldu
Katre 2ummân-ı bî-kerân oldu
Zerreden tâ varınca hurşîde
Mazhar-ı zât-ı gaybdân oldu
Erdi Hakk'dan nesîm-i vahdet-i zât
Pîr-i hum-geşte nevcivân oldu
Kâmil oldu tılısm-ı genc-i vücûd
Cism-i bâki karîn-i cân oldu
Nûş edenler Sabûhî câm-ı meyi
Mest ü bî-hûş-ı câvidân oldu
'Aşk u ma'şûk u 'âşık oldu yâr
Leyse fi'd-dâri gayruhû deyyâr
III
Eğer esfel eğerçi a'lâdır
Mazhar-ı zât-ı pâk-i Mevlâ'dır
Perde olur eğerçi zâta sıfat
Görür ol kimseler ki bînâdır
Vech-i dilber nihândır ahvâlden
Gerçi ol gün gibi hüveydâdır
Kimisini bu hayret almışdır
Kimi bu sûriş ile şeydâdır
Gûy-veş kimi cüst ü cû eyler
Katre iken kimisi deryâdır
Kimi 'âşık olup kimi ma'şûk
Kimi Mecnûn kimisi Leylâ'dır
Dilberân ol cemâl-i mazhardır
'Âşıkân ol cemâle yağmâdır
Gayr yokdur vücûd-ı vâhiddir
Kesrete aldananlar a'mâdır
Zâhiren her biri bir işde velî
Ey Sabûhî kamusu yektâdır
'Aşk u ma'şûk u 'âşık oldu yâr
Leyse fi'd-dâri gayruhû deyyâr
IV
Şâh-ı ma'nâ zuhûra çekdi 'alem
Tutdu kevni sadâ-yı hayl ü haşem
"Küntü kenz"in demi 'ayân oldu
Kapladı kâinâtı nûr-ı kadem
Nûr u zulmet çü imtizâc etdi
Oldu mir'ât-ı vech-i pâk Âdem
Yetdi vuslat safâsma 'âşık
Oldu mahrûm olanlar ehl-i harem
Ni'met-i vuslata salâ dendi
Her gedâya erişdi nâz n ni'am
Erişir menzil-i murâda yakîn
Şol ki merdâne kor bu yolda kadem
Cür'a-i câm-ı bezm-i vahdetdir
Ehl-i 'aşka bu nükte-i mübhem
Bu hakâyıkdan anlamaz münkir
Diyebilmez nedir dem-i hâtem
Ben Sabûhî anınla bînâyem
Kanda baksam anı görür dîdem
'Aşk u ma'şûk u 'âşık oldu yâr
Leyse fi'd-dâri gayruhû deyyâr
V
Sâlik isen tarîk-i vahdete ger
Dâmen-i 'aşkı tut odur rehber
Kime sunulsa sâgarı 'aşkın
Anı mest-i cemâl-i dilber eder
'Aşkdır bir mnhît-i a'zam kim
Anın emvâcıdır nukûş n suver
'Aşk bir zâtdır velî her dem
Niçe bin kesret ile cilve eder
Gâh îmân olur gehî inkâr
Gâh Birâhim olur ü gâh Âzer
Gâh derviş olur gehî sultân
Gâh Dârâ olur geh İskender
Gâh envâr-ı Ahmed-i Ümmî
Gâh esrâr-ı sîne-i Hayder
Gâh olur nâtık-ı sühan-ârâ
Gâh nutk-ı Sabûhi-i kemter
Görmeğe her libâs ile anı
Ey Sabûhî kanı bir ehl-i nazar
'Aşk u ma'şûk u 'âşık oldu yâr
Leyse fi'd-dâri gayruhû deyyâr
Sabûhî Ahmed Dede
Kuddise Sırruh