Mahviyyet
26 Şubat 2018 tarihinde yayınlanmıştır.
NUTK-İ ŞERÎF
Tecellî sırrına âgâh eder envâr-ı mahviyyet
İzâfet selbine dilden delîldir nâr-ı mahviyyet
Çekip kayd-ı kuyûd-i zulmet-i esfelle ülfetden
'Urûc u i’tilâya cezb eder esrâr-ı mahviyyet
Dilersen "lî me'allah"a erişmek milk-i ma’nâda
Dili tûr-i tecellîgâh eder etvâr-ı mahviyyet
Nikâb-ı sırr-ı "ev ednâ"yı feth eyler kerâmetle
Burûc-i "kâbe kavseyn" sırrıdır akmâr-ı mahviyyet
Bekâyâ-yı vücûd bil tâlib-i Hakk'a kedûretdir
Karîn-i istifâdır hâssa-i emtâr-ı mahviyyet
Gerekse kuhl-i vahdet rü’yet-i cânân için câne
Şühûd-i vahdeti teshîl eder enzâr-ı mahviyyet
İkilikden halâs olmazsa bulmaz vahdet-i Zât'ı
"Ene’l-Hakk"la "Hüve'l-Hakk" remzin eyler dâr-ı mahviyyet
Dedi "ve’s-sâbikûne's-sâbikûn" âyât-ı Kur’ân'da
Nişîn-i sadr ile vâsıl eder tîmâr-ı mahviyyet
Hakîkatden tecerrüdle teferrüd 'ayn-i iksîrdir
Eder tahvîl ağyâr nârını gülzâr-ı mahviyyet
Hüviyyet 'aks eder mi olmayınca pertev-i mir’ât
Ezel kenz-i hafâsı bâdî-i izhâr-ı mahviyyet
Kesâfetle letâfet perdesinden intikâl eyler
Rucû'-i bezm-i asla vâsi' eder izmâr-ı mahviyyet
Dilersen Sâmiyâ vahdetnişîn-i bezm-i lâhûtî
Eder âgâh o sırra refref-i seyyâr-ı mahviyyet
Şeyh Abdurrahmân Sâmî Saruhânî
Kaddesallahu Sırrahû'l-Âlî