Maksûdu Bu Ben Abdin Yâ Rabbi Budur Senden

NUTK-İ ŞERÎF

Maksûdu bu ben 'abdin yâ Rabbi budur senden
Dûr eyleme son demde îmânınla dîninden

Ahlâk-ı zemâimden dil levhini pâk eyle
Lutfunla 'inâyet kıl sen sûret-i ahsenden

İsrâfîl urup sûru cânlar gelicek cisme
Ne sûret ile kalkam haşrolmak içün senden

Bir tâ'at eyler iken bin türlü hatâmız var
Sen pâdişâha lâyık a'mâl-i hoşî kanden

Mümkün ola mı vuslat dîdâr-ı Hakk'a miskîn
Mâdemki kişi geçmez kendi kendiliğinden

Bu kıyl ile bu kâli 'ilm ile 'amel sandım
Bir zerrece 'aşkın yeğ 'âşıklara bin cândan

Bilmem n'ideyim ol Hakk cân ayrılıcak tenden
Bu cürm ü günâh ile râzı ola mı benden

Ömür âhire erişdi ihlâs ile tâ'at yok
Nefsim beni kul etdi ol şâh'a itâ'at yok

'Âlimse tegayyürde halk ise tehayyürde
'Ârif denilenlerde bir vecd ile hâlet yok

Taklîd ile setr oldu tahkîk olan 'âşıklar
Her bir kişi bir şeyhdir nûrânî 'alâmet yok

Ben ise günâhımdan nâle ederim her dem
Bir gayrının ahvâlin bilmeğe velâyet yok

Efkâr ile mecnûna döndüm n'ideyim bilmem
Hâlim n'icola âhir keşf ile kerâmet yok

'Âlimlerimiz şimdi bir hâlete düşmüşdür
Etdikleri ef'âlin hakkında bir âyet yok

Bilmem n'ideyim ol Hakk cân ayrılıcak tenden
Bu cürm ü günâh ile râzı ola mı benden

Terk eylemezem gerçi evrâd ile ezkârım
Ammâ ki derûnumda hep dünyâdır efkârım

Tâ'atde sanır her kim görse beni mescidde
Almak ile satmakda bâtında olan kârım

Kuşak kuşanıp gerçi bir mürşide dedim hak
Kat' etmekde çârem yok belimdeki zünnârım

Yâ Rabbi 'inâyet kıl al benliğimi benden
Dîdârına mâni'dir bu nâmûs ile ârım

Dil firkat ile yandı yâ Rabbi 'inâyet kıl
Hicrân ola mı âhir terk eylemeden vârım

Tahmîr edicek hâkim kudret eli tâ evvel
Kor mu ziyâde ede ya tamuda key nârım

Bilmem n'ideyim ol Hakk cân ayrılıcak tenden
Bu cürm ü günâh ile râzı ola mı benden

Yurd eyledi dünyâyı kendisine halk ekser
Var etme desen küfrü okur sana ol ezber

Nakl-i dili dünyâya her kişi değişmekde
Ol mertebe halk azdı yokdur sanasın mahşer

Bu sûret-i zâhirde her birimiz âdemdir
Bâtına nazar kılsan cân sûreti hep ejder

Cân Yûsuf'u habsoldu bu câh-ı vücûdumda 
Ya'kûb-dil anınçün her şâm u seher ağlar

Deryâ-yı tehayyürde kaldım n'ideyim bilmem
Bu cânımı Azrâil şu günde ki kabzeyler

Bin türlü günâhım var a'mâl-i sâlihim yok
Ne sûret ile Mevlâ yarın beni haşreyler

Bilmem n'ideyim ol Hakk cân ayrılıcak tenden
Bu cürm ü günâh ile râzı ola mı benden

Bu ten kafesinden cân mürgi edicek cevlân
Cennet mi ola menzil yâhud dûzah u nîrân

Şol gün ki mezârımda tenhâ kalıcak bilmem
Dîv ile melâikden anda kim ola yârân

Dünyâ hevesi hubb-i uhrâyı unutturdu
Her bir kişi hayretde dem-beste olup sekrân

Şimdi bana müşkil bu âhir n'icolur hâlim
Benden yana gel derse ol Hâlık-i ins ü cân

Rûz-i ezelî bilmem takdîr olunan hâli
Gam mıdır eğer etsem her şâm u seher nâlân

Yâ Rabbi Nizâmoğlu'n dûr eyleme vaslından
Yakdı beni kül etdi bu âteş ile hicrân

Bilmem n'ideyim ol Hakk cân ayrılıcak tenden
Bu cürm ü günâh ile râzı ola mı benden

Seyyid Nizâmoğlu Seyyid Seyfullah
Kuddise Sırruh