Meded Ey Kâfile-sâlâr-ı Rusül Huz Bi Yedî
11 Kasım 2022 tarihinde yayınlanmıştır.
İSTİMDÂD
Bürüyüp dîde-i im'ânımı gaflet remedi
Beni sevk etdi reh-i ma'sıyete diyv-i redi
Aman Allah içün ey Fahr-ı Cihân-ı Ebedî
Koyma vâdî-i dalâletde bu 'âsî-i bedi
Sedde-i merhametindir dilimin müstenedi
Meded ey kâfile-sâlâr-ı rusül huz bi yedî
Kulunu meyl-i hevâ çekdi serâser bende
Kolları bağlı esîr oldum efendim ben de
Başkasından olamam feyz u meded hâhende
Cümle ümmîdim eyâ Şâh-i Risâlet sende.
Olmuşum bâr-i geh-i şefkatine efkende
Meded ey kâfile-sâlâr-ı rusül huz bi yedî
İttibâ' eyleyerek nefsime oldum gümrâh
Kendime zulm ü sarîh eyledim eyvâh eyvâh
Şimdi nâdim olarak etmedeyim nâle vü âh
Âh ile girye ile geldim eyâ Şâhenşâh
Eydî-i fakrımı açdım sana şey'en-lillâh
Meded ey kâfile-sâlâr-ı rusül huz bi yedî
Lakab-ı âtıfetin şâfi'-i rûz-i arasât
Dergeh-i mekremetin cây-i eman-bahş-i 'usât
Leb-i lâ'linde dil-i mürde için âb-ı hayât
Cünbüş-i gamzene vâbeste serrâh-i necât
Bir nazar kıl bana da yâ men aleyhi's-salavât
Meded ey kâfile-sâlâr-ı rusül huz bi yedî
Merhamet eyle de mağfûr-ı kebâir olayım
Meded-i lutfun ile ehl-i besâir olayım
Feyz-i pâkin ile âgâh-ı serâir olayım
Mahlasım misli hakîkatde de tâhir olayım
Dembedem mısrâ'-ı âtî ile zâkir olayım
Meded ey kâfile-sâlâr-ı rusül huz bi yedî
Tâhirü'l-Mevlevî
Kuddise Sırruh