Meded Ey Şâh-ı Rusul Mefhar-i Küll Kân-ı 'Atâ
22 Ocak 2019 tarihinde yayınlanmıştır.
NA'T-I ŞERÎF
Meded ey şâh-ı rusul mefhar-ı küll kân-ı 'atâ
Meded ey şems-i duhâ nûr-i hüdâ bedr-i dücâ
Meded ey seyyid-i kevneyn resûl-i sekaleyn
Meded ey cedd-i Hüseyn server-i ceyş-i şühedâ
Meded ey hulku 'azîm tab'ı selîm dürr-i yetîm
Meded ey gevher-i gencîne-i esrâr-ı Hudâ
Meded ey şem'-i ziyâ-küster-i bezm-i lâhût
Meded ey meş'ale-i şa'şa'a-pîrâ-yı verâ
Ey nebiyy-i 'arabî pâdişeh-i Rûm u 'Acem
V'ey habîb-i medenî şâhid-i şehr-i Bathâ
'Aşk-ı pâkinle feleklerde melekler her ân
Zühre-veş raksa girer şevk ile hep ehl-i semâ
Hâtır-ı pâkin içün Âdem'e oldu ikrâm
"Ve nefahtü fîhi min rûhî" buyurdu Mevlâ
İsmini vird-i zebân itmek ile Nûh-ı Necî
Etdi tûfân-ı belâda nice bin zevk u safâ
Yümn ile Mekke'de olmasa idi mevlûdun
Halîl İbrâhîm eder miydi o vâdîde binâ
Mazhar-ı sabrın eğer olmasa Eyyûb Nebî
Hiç tahammül mü ederdi o kadar rence şehâ
Ya'kûb anmasa eğer külbe-i ahzânda seni
Meh-i Ken'ân'a erer miydi o mahzûn hâşâ
Hüsn-i Yûsuf'da melâhat mı olurdu zerre
Pertev-i 'aks-i ruhundan eğer olmasa zıyâ
'Âşık-ı nûr-ı cemâlin eğer olmasa idi
Yed-i beyzâ-yı Kelîm'e verilir miydi 'asâ
Ümmetin olmak içün Hazret-i Îsâ-yı Mesîh
Rûh olup göklere çıkdı o ferişteh-sîmâ
Her ne var yerde vü gökde melek ü cinn ü beşer
Hep senin medhin eder sâkin-i 'arz u semâ
Hem Ebûbekr ü Ömer Hazret-i Osmân Hayder
Senden öğrendi bular sıdk u edeb 'adl ü sehâ
Şerbet-i vaslın yâd eylemeseydi Hasan'ın
İçdiği zehre liyâkat mı olurdu 'acabâ
Seri meydâna koyup yoluna cân vermedi mi
Teşne-leb şâh-ı şehîdân Hüseyn-i yektâ
Meded ey şâfi'-i Müştâk Habîb-i Hallâk
Meded ey rehber-i 'uşşâk u şefâ'at-bahşâ
Kalmışam hâk-i mezelletde zelîl ü 'âciz
Tut elim eyle rehâ ey şeh-i evreng-i 'atâ
Gerçi bir bende-i şermende günehkârım ben
Yine dîdârına Müştâk'ım eyâ şems-i duhâ
Müştâk Baba
Kuddise Sırruh